Policia jep më shumë detaje nga alarmi për lëndë eksplozive në redaksinë e televizionit Report Tv.

Përmes një komunikate thuhet se alarmin në numrin e emergjencave e ka dhënë një gazetar i këtij televizioni.

Pas kontrollit policor ka rezultuar se nuk kishte lëndë eksplozive.

Si autor i dyshuar për ngjarjen është ndaluar shtetasi Shkëlqim Tarja. Më poshtë komunikata e plotë e policisë.

Më datë 23.08.2016, rreth orës 13:25, në numrin e emergjencave 112, ka njoftuar një gazetar i televizionit  Report TV, se në ambjentet e Report TV, mund të ketë një sasi me lendë eksplozive, pasi i kanë dërguar një mesazh kërcënues.

Në adresën e dhënë janë dërguar forca të shumta të policisë dhe morën të gjitha masat si dhe u bë evakuimi i punonjësve.

Pas kontrollit të ambienteve të Report Tv nuk është gjetur lëndë eksplozive.

Shërbimet e Komisariatit të Policisë Nr 1, bënë të mundur identifikimin dhe kapjen e shtetasit Shkëlqim Tarja, si autorë i dyshuar i këtij kërcënimi.

Grupi hetimor po vazhdon hetimet për sqarimin e plotë të rrethanave të këtij incidenti.