Gazetari investigativ Artan Hoxha ka deklaruar se “Panama Papers” ka rreth 10 mijë faqe material për Shqipërinë, të cilat sipas tij do të publikohen në fillim të muajt maj. I ftuar në emisionin “Opinion” për temën “Sekretet e parave të pista të Shqipërisë”, Hoxha tha se studio ligjore në Panama i jep informacione të tilla vetëm për mediat kundrejt një pagese të caktuar. Gazetari shtoi se drejtues të lartë të shtetit dhe politikanë shqiptarë kanë pastruar paratë e tyre në parajsa të tilla fiskale. Lidhur me përfshirjen e biznesmenit Ismail Mulleti, Hoxha tha se ky është një rast që nuk vlen për t’u paragjykuar.