E kanë quajtur “Culotte-Gate”, apo skandali i mbathjeve.

Bëhet fjalë për ministrin francez të financave Michel Sapin, që është akuzuar se ka tërhequr fillin elastik të mbathjeve të një gazetareje gjatë forumit ekonomik të Davosit.

Lajmi ka dalë në librin “Elysée off”, të Aziz Zemouri dhe Stéphanie Marteau.

Menjëherë mendimet shkojnë për paraardhësin e Sapin, Dominique Strauss-Kahn, i përfshirë në një skandal seksual si kreu i FMN-së dhe që i kushtoi zgjedhjen si president i Francës.

Skandali i Sapin u përfol që në maj të vitit të kaluar, por ai nuk u përmend me emër.

Sipas librit, ai ka parë një grup gazetaresh dhe mes tyre i kanë shkuar syte te njëra që i ishte zbuluar filli i tangave.

“Çfarë jeni duke më treguar” – ka thënë ai duke e tërhequr nga mbathjet.

Vetë ministri i ka përgënjeshtruar këto lajme, por mediat shkruajnë se ai është pranë dorëheqjes.