Partizani fiton 1-0 në Korçë, mban gjallë shpresat për titull

Partizani mban gjallë shpresat për titull, pasi arriti të marrë tre pikë në një ndeshje dramatike në Korçë përballë Skënderbeut. Goli i Emiljano Vilës bën që “të kuqtë” të vazhdojnë të ëndërrojnë për trofeun e ligës.

Kur luhej minuta e 89, Partizani fiton një goditje dënimi pranë portës së Skënderbeut dhe pas krosimit të Kalarit, Vila shënon golin që vlen 3 pikë.

Në të vërtetë, Vila ishte i pafat në fillim të pjesës së dytë, kur gjuajti nga jashtë zone me të majtën e tij, po topi u përplas në të dyja shtyllat para se të shkojë në këmbët e Filit, por as ky i fundit nuk arriti të shënojë.

E gjithë vëmendja porsa i përket kampionit tashmë transferohet në javën e fundit, aty ku Skënderbeu do të luajë në Vlorë ndaj Flamurtarit që kërkon mbijetesën, ndërsa Partizani do të presë në Tiranë Teutën që shpreson Europën.

Skënderbeut i mjafton vetëm një pikë nga sfida e fundit ndaj Flamurtarit, por korçarët tani do të vuajnë edhe mungesën e sulmuesit Hamdi Salihi i cili është i pezulluar për shkak të kartonëve.

https://www.facebook.com/Cerciz-Loloci-444479355625593/