Kryeqyteti shqiptar do të bëhet për herë të parë mikëpritës i punimeve të Asamblesë Parlamentare të NATO-s, e cila do të zhvillojë punimet nga datat 27 deri në 30 maj. Në këtë aktivitet të rëndësishëm ndërkombëtar do të marrin pjesë rreth 700 pjesmarrës nga vendet anëtare të NATOS-s, vendet vëzhguese, vendet partnere, Parlamenti Europian, OSBE-ja dhe Këshilli i Europës.

Nënjë deklaratë për mediat, Kryetar i delegacionit të Shqipërisë në ASP, Pandeli Majko bëri të ditur se Asambleja Parlamentare e NATO-s përbëhet nga 257  anëtarë. Ata janë parlamentarë të zgjedhur nga radhët e deputetëve të parlamenteve kombëtare nga vendet anëtare të Aleancës së Atlantikut. Kjo është e bazuar në procedura të  cilat sigurojnë që përbërja e delegacioneve të reflektojë përfaqësimin e forcave politike në cdo Parlament Kombëtar.

Asambleja Parlamentare e NATO-s, që nga krijimi i saj në vitin 1955, u siguron anëtarëve të saj mundësinë që të debatojnë cështjet politike dhe të sigurisë së Aleancës dhe të ndikojnë në marrjen e vendimeve që lidhen me të ardhmen e saj.

Asambleja Parlamentare e NATO-s kontribuon në çështjet kryesore që kanë të bëjnë me sigurinë e zonës Euro-Atlantike dhe ndihmon në kontrollin më eficent nga parlamentet kombëtare të institucioneve që kanë të bëjnë më mbrojtjen dhe sigurinë kombëtare.

“Edhe pse Asambleja Parlamentare është institucionalisht e ndarë nga struktura ekzekutive e NATO-s, ajo përbën lidhjen thelbësore ndërmjet saj dhe parlamenteve të vendeve anëtare të Aleancës. Ajo siguron transparencë më të madhe politike të Organizatës së Traktatit të Atlantikut të Veriut dhe lejon ligjvënësit dhe qytetarët e Aleancës të kuptojnë më mirë objektivat dhe detyrat e kësaj të fundit”, tha Majko.

Ai vijoi se “Shqipëria si vend anëtar i NATO-s ka nderin që të mikëpresë Asamblenë Parlamentare. Disa dekada më parë, Shqipëria ishte pjesë e Traktatit të Varshavës, dhe më pas një nga vendet më të izoluara në Europë. Mbajta e Asamblesë Parlamentare të NATO-s në Tiranë është një cilësi e asaj që ka ndyshuar në statusin ndërkombëtar të Shqipërisë.