Vlorë, 20 maj 2016, NOA.al- Prokuroria e Vlorës ka urdhëruar sekuestron e një sipërfaqe toke 20 mijë metra katrorë, në zonën Palermo-Himarë, pasi dyshohet se është përfituar nëpërmjet dokumenteve të falsifikuara nga ana e një personi.

Prokuroria e Vlorës ka nisur hetimin në bazë të kallëzimit të disa personave, të cilët kanë dokumentacionin e trashëgimisë së ligjshme mbi pronën, e cila aktualisht është e regjistruar në Zyrën Vendore të Regjistrimit të Pasurive të Paluajtshme, Vlorë, në emër të Vasil Rrapo.

Në bazë të hetimit, Prokuroria e Vlorës ka konstatuar se Rrapo ka përfituar tokë në bazë të ligjit 7501, “Për tokën” një sipërfaqe prej 9582 m2.

Por, në Hipotekën e Vlorës, sipërfaqja e tij rezulton 29.582 m2. Prokuroria ka bërë veprimet e nevojshme hetimore, nga ku ka rezultuar se është falsifikuar dokumenti për marrjen e tokës, në të cilin është shtuar numri “2” përpara shifrës së sipërfaqen reale, duke e shndërruar pronësinë e shtetasit Vasil Rrapo nga 9582 m2 në 29.582 m2.

Në vijim, Prokuroria e Vlorës ka konstatuar se pjesa më e madhe e kësaj sipërfaqe, e cila është regjistruar në ZVRPP në emër të shtetasit Vasil Rrapo, është tjetërsuar, duke u shitur te persona të tretë ose duke u dhuruar.

Prokuroria e Vlorës, Njësia Task-Force, ka konstatuar gjithashtu se pjesa e pasurisë së tjetërsuar i përket asaj sipërfaqe toke, e cila dyshohet se është përfituar nëpërmjet dokumenteve të falsifikuar. Aktualisht, Vasil Rrapo ka në pronësi pjesën e tokës, e cila i është njohur që në vitin 1991, në zbatim të ligjit nr.7501, “Për tokën”.

Në këto kushte, Prokuroria e Vlorës ka kërkuar në Gjykatë vendosjen e sekuestros preventive për 20.000 m2, e cila është pjesa e sipërfaqes, e dyshuar si e përfituar në mënyrë të paligjshme nga Rrapo dhe që më pas u është shitur personave të tjerë.