Shumë ‘zviceranë’ te Shqipëria
Zvicra dhe Shqipëria do të takohen në ndeshjen e parë të Grupit A, të shtunën më 11 qershor duke filluar nga ora 15:00
Zvicra A kundër Zvicrës B, apo Shqipëria A kundër Shqipërisë B? Kjo është çështja që ka ngritur gazeta zvicerane ‘Blick’, në prag të ndeshjes hapëse në Euro 2016 mes këtyre dy përfaqësuesve, përcjell albinfo.ch.
Zvicra dhe Shqipëria do të takohen në ndeshjen e parë të Grupit A, të shtunën më 11 qershor duke filluar nga ora 15:00.
Kjo përballje ka ngjallë interesim të madh të opinionit, pasi që në përfaqësuesen e Zvicrës luajnë gjashtë lojtarë me prejardhje shqiptare, por edhe te Kombëtarja Shqiptare 12 nga 23 lojtarët e ftuar nga Gianni De Biasi hapat e parë të futbollit i kanë marrë në Zvicër, disa prej tyre kanë qenë edhe pjesë e përfaqësuesve të reja. “Sa shumë zviceranë në Shqipëri”, është titulli i “Blick”.
Ansi Agolli, Amir Abrashi, Frederic Veseli, Taulant Xhaka, Shkëlzen Gashi, Arlind Ajeti, Migjen Basha, Lorik Cana, Burim Kukeli, Ermir Lenjani, Naser Aliji dhe Armando Sadiku, janë lojtarët shqiptarë që luajnë në Zvicër, po që hapat e parë të futbollit i kanë marrë në Zvicër.