Top Channel kontaktoi me burime të rëndësishme brenda Prokurorisë së Përgjithshme dhe jozyrtarisht këto burime sqarojnë se edhe vetëm lokalizimi dhe identifikimi i IMEI-t të aparatëve telefonike sipas ligjit shqiptar është pjesë e procesit të përgjimit.

Ky sqarim tashmë është pjesë e dokumentit që Prokuroria ka dorëzuar në gjykatë, pasi hyrja e pajisjes qoftë për trajnim, kërkonte autorizimin e Prokurorit të Përgjithshëm.

Po a janë italianët përgjegjës për këtë proces? Sipas burimeve në Prokurori, italianët janë të përjashtuar pasi përgjegjësinë për hyrjen e pajisjeve të tilla e ka pala shqiptare.

Me marrëveshjen e vitit 2007 i takon autoriteteve vendase që të orientojnë palën tjetër, në këtë rast palën italiane për veprimet në bazë të ligjit.

Sot për këtë çështje në Prokurorinë e Përgjithshme pati një takim mes krerëve të saj, të Prokurorisë së Tiranës, Krimeve të Rënda dhe kreut të SHISH, Visho Ajazi Lika.

Përbërja e takimit duket se ka në fokus shtrirjen e hetimit edhe tek persona me imunitet, përfshirë edhe ministrin e Punëve të Brendshme.