Eordejtë ishin fis ilir, banorë të krahinës Eordea, në rrjedhën e sipërme të Devollit dhe në trevën e liqeneve të Kosturit. Përmenden shpesh në kohën e luftërave romako-maqedone. Më 199 p.e.s. trojet e tyre u shkatërruan nga ushtria e konsullit romak Sulpici dhe më 171 p.e.s. u përshkuan nga ushtria maqedone e Perseut. Pas pushtimit romak Eordea u përfshi në krahinën IV maqedone. Nëpër të kalonte rruga Egnatia. Qytetet kryesore ishin Eordea dhe Kele.