Sipas një raporti vjetor të lëshuar të enjten nga CET, Google e ka tejkaluar Apple-n dhe ka zënë pozitën në krye të markave më të vlefshme në botë, raporton agjencia e lajmeve DPA, përcjell albinfo.ch.

Sipas studimit “BrandZ”, i cili është bërë nga kompania për hulumtimin e tregut “Millward Brown”, në listat e njëqind markave më të mira dhe më të shtrenjta, vlera e Google-s është llogaritur në 229.2 miliardë dollarë.

I njëjti burim thotë se Apple ka humbur 8 për qind të vlerës së saj, e cila tani qëndron në 228,5 miliardë.

Në mesin e pesë markave janë ato amerikane Microsoft me 121.8 miliardë dollarë, një kompani e telekomunikacionit AT & T, e cila ka një rritje me 20 për qind të vlerës dhe rrjeti social Facebook, i cili me rritjen prej 44 për qind tani posedon vlerën 102.5 miliardë dollarë.

Analistët dhe ekspertët e markave kontributet më të mëdha për rritjen e Google-s ia atribuan strategjisë së zhvillimit në bazë të inovacionit.

Ekspertët nga kompania “Millward Brown” analizat e tyre i kanë bazuar në të dhënat financiare të kompanive, anketave në mesin e konsumatorëve dhe vlerësimin e tyre. Kjo është tashmë lista e dhjetë e tillë e kësaj kompanie dhe në një studim të ngjashëm që e kishte përpiluar kompania konsulente “Interbrand”, Apple ishte ende përpara Google.