Beqir Sina
Një grup prej më shumë se 200 vetësh ka mbërritur qysh dje pasdite në Paris nga New York-u. Sipas paralajmërimit, 1200 tifozë shqiptarë do të jenë gjatë këtyre ditëve pjesë e festës kuqezi, në mbështetje të kombëtares mbarëshqiptare në stadiumet e Francës.
Federata Shqiptare e Futbollit, ka thënë se ka marrë 40 mijë kërkesa për vetëm 5-6 mijë bileta, që u kishte rezervuar UEFA. Nga këto bileta jo zyrtarisht, thuhet se 1200 i janë dhënë agjensive shqiptare të udhëtimit në SHBA, dhe, që të gjitha biletat u shitën në një kohë rekord.
Në Lens ku Shqipëria, do të luajë sot në orën 9 të mëngjezit me kohën e Nju Jorkut, kundër Zvicrës, në stadiumin legjendar Bollaert, i cili ka një kapacitet për 35 mijë tifozë, do të ketë edhe prezencën e 1200 shqiptarëve të Amerikës.
Sipas shtypit shqiptar për çdo ndeshje Federata Shqiptare e Futbollit, kishte në dispozicion vetëm 16% të kapacitetit të stadiumit ashtu si dhe kundërshtarët e saj. 68% mbeten për tifozët neutralë, por për shkak se ka shumë shqiptarë në vendet e Europës ata pritet të kenë marrë një numër të madh të këtyre vendeve “neutrale” pasi kanë aplikuar si shtetas jo-shqiptarë.
Ndërkohë, katër anëtarë të Klubit Futbollistik “Korabi”, në New York, të cilët nuk i janë ndarë kombëtares shqiptare, edhe në ndeshjet eleminatore në grupin E, ku luajti përfaqësuesja jonë ( Kopenhagen, Lisbonë, Elbasan, dhe Erevan) momentalisht gjenden në Parisë, për të ndjekur 3 ndeshjet e e grupit të kombëtares kuqezi në kuadrin e Francë Euro 2016.
Ata janë katër shqiptaro-amerikanët kuqezi të apasionuar pas futbollit dhe mbështetës të zjarrtë të Kombëtares kuq e zi : Murat Mela,Nihat Kërkuti,Kujtim Kaziu dhe Besim “TITI” Maqellara.
Veprimtari i njohur i komunitetit ish Presidenti i KKSHA, Martin Shkreli, ka udhëtuar për në Parisë, së bashku me dy djemët e tij, të dy futbollista nga shkolla amerikane e futbollit në Nju Jork,
Edhe, veprimtari tjetër i komunitetit strugani Ylber Korça, anëtar i Rrjetit të Bizneseve Shqiptare në Botë, ka udhëtuar së bashku me djalin futbollist nga shkolla amerikane në Dallas, dhe me anëtarët të tjerë të familjes.
Nga Nju Jorku, kishte udhëtuar për të mbështetur kombëtaren kuqezi në Francë, edhe ish-kryetari i shqoatës Ana e Malit Ismet Kurti.
Nga fotografitë e postuara në rrjetin social Facebook, thuhet se ka edhe një numër të madh tifozësh kuqezi, nga Detroiti, Çikago, Toronto, Arizona, Filadelfia, Uashingtoni, Tampa, dhe Dallasi.
