Kremlini njoftoi sot se Rusia dëshiron që të rivendosë marrëdhënie të mira me Turqinë pas letrës së urimit të Presidentit Recep Tayyip Erdogan ndaj Vladimir Putinit me rastin e Ditës Kombëtare të Rusisë.

Megjithatë Presidenca e Federatës Ruse shtoi se Ankaraja duhet së pari të ndërmarrë hapa të caktuara për këtë.

“Urojmë dhe shpresojmë që të rivendosen marrëdhëniet e mira me Turqinë”, deklaroi Kremlini pas letrave, që Presidenti turk, Recep Tayyip Erdogan dhe Kryeministri Binali Yildirim u dërguan më 12 qershor homologëve përkatës në lidhje me Ditën e Rusisë.

“Ne do të donim dhe duam një normalizim të marrëdhënieve tona dhe kthimin e tyre në periudhën e bashkëpunimit të mirë dhe reciprokisht të dobishëm”, ka thënë zëdhënësi i Kremlinit, Dmitry Peskov, në një konferencë me gazetarët.

“Por, në të njëjtën kohë, Presidenti Putin e ka bërë të qartë se pas asaj që ndodhi, një normalizim i marrëdhënieve nuk duket të jetë i mundur para se Ankaraja të ndërmarrë hapat e nevojshëm”, tha ai duke iu referuar këmbënguljes së Rusisë që Turqia të kërkojë falje dhe të paguajë kompensim për rrëzimin e avionit.

Gjatë një darke iftari mbrëmjen e të martës në Ankara, zv/kryeministri i Turqisë, Numan Kurtulmus, deklaroi se urimi i Presidentit Erdogan me rastin e Ditës Kombëtare të Rusisë mund të paraqesë një hap përpara drejt normalizimit të marrëdhënieve mes dy vendeve.

Marrëdhëniet Turqi-Rusi u tensionuan menjëherë pas rrëzimit të një avioni luftarak, që dhunoi hapësirën ajrore turke më 24 nëntor të vitit të kaluar.

Vetëm pas ngjarjes u mësua se avioni i rrëzuar ishte një “SU-24” i Forcave Ajrore të Rusisë.