Njohës të marrëdhënieve ndërkombëtare në Maqedoni, thonë se zgjidhja e mosmarrëveshjes për emrin ndërmjet Maqedonisë dhe Greqisë, nuk mund të bëhet në një kohë me zgjidhjen e krizës politike në vend.

Bekim Kadriu njohës i marrëdhënieve ndërkombëtare, thotë se mungesa e legjitimitetit të udhëheqjes aktuale në Maqedoni e përjashton mundësinë e zgjidhjes së problemit të emrit në kohën e krizës politike në vend.

”Shumë më e arsyeshme do të jetë që për çështjen e emrit të diskutojnë dy qeveri të cilat kanë legjitimitet të plotë përkatësisht mandat të plotë nga qytetarët. Është e pa pranueshme që për çështjen e emrit të diskutojë kjo përbërje e qeverisë e cila është e diskredituar si para opinionit të brendshëm ashtu dhe para bashkësisë ndërkombëtare”, thekson Kadriu.

Sipas tij vetëm ajo qeveri e cila do të dalë nga organizimi i një procesi të besueshëm zgjedhor në Maqedoni do të ketë mundësi që seriozisht të hap negociata rreth zgjidhjes së problemit të emrit me Greqinë, duke mundësuar procesin e integrimeve euroatlantike për Maqedoninë si shtet.

Edhe Nikolla Dimitrov, ish përfaqësues i Maqedonisë gjatë bisedimeve me Greqinë për zgjidhjen e çështjes së emrit thotë se në këtë moment çështja e emrit nuk mund të diskutohet në asnjë mënyrë për shkak se kredibiliteti i institucioneve shtetërore është vënë në pikëpyetje.

“Në një mënyrë kriza politike është si rrjedhojë e bllokimit të procesit euroatlantik për Maqedoninë për këtë arsye çështja e emrit është aktuale por në kushte kur tërësisht është rrënuar kredibiliteti i të gjitha institucioneve shtetërore shtrimi i çështjes së emrit në tryezën e bisedimeve do të jetë shumë i paarsyeshëm”, thekson Dimitrov.

Ndërkaq Bojan Mariqiq nga qendra për Arsim Evropian konsideron se edhe bashkësia ndërkombëtare tërë presionin ndaj udhëheqësve politik e ka fokusuar në jetësimin me përpikmëri të pikave që janë përcaktuar në marrëveshjen politike mes katër liderëve të partive kryesore politike.

Mariqiq thotë se në këtë moment që ndodhet Maqedonia është shumë e vështirë që udhëheqësit shtetërorë të shtrijnë veprimin edhe në një front shumë të ndjeshëm siç është zgjidhja e kontestit që ka Maqedonia me Greqinë për çështjen e emrit.

“Në këtë moment në të cilin ndodhet Maqedonia,e zhytur në krizë të thellë politike,nuk besoj dikush do të imponojë dhe hapjen e çështjes së emrit në tryezën e bisedimeve mes katër liderëve politik, sepse kjo do të kishte të kishte efekte negative ndaj marrëveshjes politike për të cilën qytetarët kanë shprehur mbështetje, si rrugë për ta nxjerrë vendin nga kriza”, thotë Mariqiq.

Krahas zgjidhjes së kontestit që ka Maqedonia me Greqinë për çështjen e emrit kusht për anëtarësimin e Maqedonisë në strukturat euroatlantike tani është vendosur jetësimi me përpikmëri i marrëveshjes politike të Përzhinos që nënkupton krijimin e kushteve për realizimin e një procesi zgjedhor të besueshëm, reformat në media, si dhe bashkëpunimin e të gjitha institucioneve të shtetit me Prokurorinë Speciale e cila ka hapur hetime për përfshirjen e zyrtarëve të lartë të shtetit në mashtrime zgjedhore dhe afera korruptive.