“U bëj apel prindërve të kontrollojnë herë pas here kopshtet ku lënë fëmijët. Të mos i çojnë aty dhe të ikin, sepse për një makinë që çojmë në servis shkojmë disa herë dhe kontrollojnë se si po riparohet (që është gjë materiale) dhe jo më për një fëmijë…”.

Ky është mesazhi që jep sot, babai i djalit 3 vjeçar që u rrah barbarisht nga administratorja e kopshtit privat “Deren” në Sauk të Tiranës.

Ajo (Anjeza Shabani) është sot prapa hekurave duke u përballur me dy akuza: “dhunë ndaj të miturve” dhe “shpërdorim detyre”. Babai i fëmijës së dhunuar kërkon dënim maksimal për të. Sakaq ai jep edhe të tjera të dhëna tronditëse.

Ai tha për “Stop” se ditën që është kryer rregjistrimi (14 qershor 2016) fëmija ka qarë gjatë ditës, pasdites dhe darkës. Sipas tij fëmija është ngritur në mesnatë, duke qarë dhe qëlluar kokën me grushte. Babai e ka filmuar këtë episod tejet të dhimbshëm të fëmijës së tij dhe e ka vendosur në dispozicion të STOP-it. Ai përmend me emra edhe 3-4 fëmijë të tjerë të dhunuar në këtë kopsht nga Shabani dhe një edukatore tjetër e kopshtit Deren.