Kryeministri Edi Rama do të tentojë sigurimin e 71 votave në Parlament jo për të votuar qeverinë e tij, por për rrëzimin e saj, duke u mbështetur në nenin 104 të Kushtetutës. Kjo skemë e Ramës synon çuarjen e vendit në zgjedhje të parakohshme parlamentare, pasi në një rast të tillë brenda 48 orësh, Kuvendi njofton Presidentin e Republikës, i cili brenda 10 ditësh duhet të dekretojë datën për zgjedhjet e parakohshme.

Në nenin 104 të Kushtetutës përcaktohet “Kryeministri ka të drejtë t’i paraqesë Kuvendit mocion besimi ndaj Këshillit të Ministrave.  Në rast se mocioni i besimit votohet nga më pak se gjysma e të gjithë anëtarëve të Kuvendit, Kryeministri, brenda 48 orëve nga votimi i mocionit, i kërkon Presidentit të Republikës shpërndarjen e Kuvendit.  Presidenti shpërndan Kuvendin brenda 10 ditëve nga marrja e kërkesës. Kërkesa për mocion besimi nuk mund të paraqitet gjatë periudhës së shqyrtimit të mocionit të mosbesimit, sipas nenit 105. Votimi i mocionit nuk mund të bëhet pa kaluar tri ditë nga paraqitja e tij”.

Media ka bërë llogaritë e votave në Kuvend nga ku rezulton se Edi Rama nuk i ka 71 votat për të votëbesuar Qeverinë e tij, çka do të thotë se skema e tij mund të realizohet, nëse të gjithë deputetët e PS-së do të votojnë në bllok kundër mocionit të besimit, përfshi këtu edhe deputetët e PD-së. Nëse kjo skemë e Ramës nuk do të mund të vihet në zbatim kjo do të ndodhë vetëm nëse deputetë të PD-së dhe LSI-së, si dhe të pakënaqurit nga PS do të bashkojnë votat për të mbajtur në këmbë përkohësisht Qeverinë Rama, dhe më pas duke shfrytëzuar nenin 105 të Kushtetutës të paraqesin mocion mosbesimi ndaj Qeverisë.

Neni 105 i Kushtetutës parashikon “Një e pesta e deputetëve ka të drejtë të paraqesë për votim në Kuvend një mocion mosbesimi ndaj Kryeministrit në detyrë, duke propozuar një Kryeministër të ri. Kuvendi mund të votojë një mocion mosbesimi ndaj Kryeministrit vetëm duke zgjedhur me votat e më shumë se gjysmës së të gjithë anëtarëve të tij një Kryeministër të ri. Presidenti i Republikës dekreton shkarkimin e Kryeministrit në detyrë dhe emërimin e Kryeministrit të zgjedhur jo më vonë se 10 ditë nga votimi i mocionit në Kuvend”.

Por që të realizohet kjo skemë e dytë, pra sipas nenit 105 të Kushtetutës, duhet të deputetët e PD-së të votojnë bashkë me ato të LSI dhe deputetë të tjerë brenda PS-së pro mocionit të besimit që do të praqesë Rama, nëse e ndërmerr një hap të tillë. Por llogjikisht duket e papranueshme qoftë edhe në aspektin politik, që deputetë të PD-së të votëbesojnë Ramën, qoftë edhe duke pasur si qëllim skenarin nr 2, rrëzimin e tij sipas nenit 105 të Kushtetutës, që shmang zgjedhjet e parakohshme, pa një qeveri teknike.

Tashmë të dy skenarët janë në lojë dhe vetëm përllogaritjet e votave të minutës së fundit mund të përcaktojnë se vendi do të shkojë në zgjedhje të parakohshme me Qeverinë Rama, apo zgjedhjet e parakohshme do të kalojnë përmes një qeverie teknike.