Udhëzimet specifike të Uashingtonit

Shtetet e Bashkuara të Amerikës aplikojnë atë që quhet instrumenti i krizës, i cili kur vihet në zbatim, ka disa nivele të tij. Niveli i parë është niveli i udhëzimeve politike. Një i tillë i ka ndodhur Partisë Socialiste tre vite më parë, kur hezitonte të votonte draftin e Gjykatës Administrative. Në atë kohë, ambasadori amerikan në Tiranë i komunikoi zotit Rama shqetësimin politik të SHBA për qëndrimin e PS dhe Rama reflektoi.

Niveli i dytë i dorëzimit të instruksioneve për veprim politik, në rast krize, është ky që ambasadori Lu ka bërë dje publik, dhe që thotë se do t’ua dorëzojë liderëve të partive politike. Por, siç paralajmëroi ambasadori Lu, bëhet fjalë dhe për udhëzime që do të kenë ndikim afatgjatë personalisht për udhëheqësit politikë që votojnë kundër reformës. Edhe pse kjo nuk është e specifikuar, bëhet fjalë për futjen në listën e zezë të presidentit të SHBA, e cila është një nga instrumentet kundër liderëve politikë në botë që refuzojnë të luftojnë korrupsionin dhe janë të identifikuar si udhëheqës që blejnë pushtetin e tyre apo me lidhje me terrorizmin. Lista e zezë e presidentit të SHBA bëhet publike nga presidenti, por ajo hyn në veprim menjëherë kur shkojnë rekomandimet. Ajo nënkupton izolim fizik, mungesë vize për SHBA dhe BE, si dhe konsekuenca në rrethin tënd të afërt familjar në këto drejtime.