LSI i përgjigjet Ramës: Pa konsensus nuk ka zbatim të reformës në drejtësi

Lëvizja Socialiste për Integrim shprehet e bindur se nuk do të ketë zbatim të reformës në drejtësi pa konsensus të plotë ashtu siç ndodhi me votimin e 21-22 korrikut kur u votuan unanimisht ndryshimet kushtetuese që i hapnin rrugën procesit të reformës në drejtësi.

Emiljano Aleksi, këshilltar i kryetarit të Kuvendit, Ilir Meta, dha këtë mesazh sot, në kuadrin e një analize që i bënte deklaratave të fundit të Spartak Ngjelës kundër Ilir Metës.

“Kjo reformë kushtetuese, historike, e drejtësisë, që u kurorëzua me një konsensus historik, ishte dhe mbetet domosdoshmëri që duhet të vazhdojë me konsensus”, – thotë Aleksi i cili vazhdimisht përcjell qëndrimet zyrtare të kryetarit të Parlamentit dhe LSI, Ilir Meta.

Aleksi përmend faktin se “konsensusi në mesnatën e 21-22 korrikut lindi një dritë shprese për të gjithë shqiptarët”, duke theksuar se ishte një konsensus unanim i paparë që përveç të tjerash ka si qëllim frenimin e gojëtarëve delirantë dhe shkatërrimtarë të kësaj gjuhe konfliktuale.

Në vazhdim pritet që të kalohen për miratim në Parlament, shtatë ligje të cilat lidhen me procesin e reformës në drejtësi. Këto ligje i hapin rrugën zbatimit të procesit reformues në drejtësinë shqiptare.

LSI ka kërkuar vazhdimisht që ky proces të gëzojë konsensus të plotë dy palët kryesore në vend, për të pasur sukses.