Në peticion thuhet se kanë firmosur mbi 80% të artistëve të Teatrit Kombëtar të Operas, Baletit dhe Ansamblit Popullor. Kërkojnë që Edi Rama të mos pranojë dorëheqjen e Ilir Kernit nga posti i drejtorit. Në njoftimin për mediat thuhet se shumica e artistëve dhe punonjësve të Teatrit Kombëtar të Operas, Baletit dhe Ansamblit Popullor u kthyen nga pushimet për të firmosur peticionin në mbështetje të Ilir Kernit, pas lajmit se ai ka paraqitur dorëheqjen.

“Njeriu me parime, që ka arritur të mbajë larg prej TKOBAP deri tani pandershmërinë, mediokritetin, nepotizmin dhe klientelizmat” e konsiderojnë artistët Ilir Kernin, njeriun që paraqiti dorëheqjen pas një konflikti me Ministren e Kulturës Mirela Kumbaro. Nga një status i Kernit në Facebook u pa qartë se ai ishte në konflikt me eprorët në ministri për shkak të buxhetit të ulët. “Për rekord Guiness” shkruante Kerni.