Egjipt, zbulohet barka më antike e Faraonit

Sipas studiuesve mjeti lundrues i përket një periudhe 3000 vjet përpara Krishtit

I përket një periudhe rreth 3000 vjet para Krishtit, kur në Egjiptin e Lashtë mbretëronte faraoni Den i dinastisë së parë, barka më e vjetër e gjetur deri më tani.  Lajmërimi është bërë nga sekretari i shtetit egjiptian për antikitetin, Mohamed Ibrahim Ali, i cili ka sqaruar se mjeti lundrues antik, që varrosej bashkë me sovranin, pasi i shërbente për “të kaluar në botën e përtejme” është gjetur në Abu Rawash, lokalitet rreth tetë kilometra në veri të Gizës, ku shtrihet rrënojat e piramidës së “zhdukur” të Djedefre, djali dhe pasuesi i Keopsit. Ali ka shpjeguar se barka e çmuar është në gjendje të mirë dhe ekipi i institutit francez të arkeologjisë orientale e ka transferuar në Muzeun egjiptian për tu restauruar dhe më pas do të ekspozohet në Muzeun Kombëtar të civilizimit egjiptian, një muze i ri që pritet të hapet brenda këtij viti.