Një pianiste franko-shqiptare do të interpretojë, të martën, në Manhattan, në ceremoninë e fillimit të vitit shkollor, në Qendrën e të Graduarve, në CUNY.
18-vjeçarja Marie-Ange Nguci do të fillojë edhe vetë studimet në Universitetin e Qytetit, për një Doktoratë në Muzikë.
Ajo ishte vetëm 16 vjeç, kur u diplomua me gradën Master në interpretimin me piano. Juria e Konservatorit Kombëtar Superior të Muzikës në Paris në mënyrë unanime e vlerësoi me nderime të klasit të parë.
Eklektike dhe pafundësisht kurreshtare si nga ana muzikore ashtu edhe ajo intelektuale, Marie-Ange është regjistruar tani për kursin prestigjioz të të njëjtës shkollë, në CNSMDP të Diplomës së Artistit ndërsa po konkurron për grada të tjera Master në pedagogjinë muzikore, analizën e muzikës dhe muzikologji në Universitetin e Sorbonës.
Në sajë të programit Erasmus, ajo u njoh me artin e dirigjimit të orkestrave në Vjenë të Austrisë.
Tashmë 18-vjeçare, Marie-Ange Nguci është pranuar në programin e Doktoratës për Muzikën, në CUNY, Programi Pasuniversitar i Universitetit të Qytetit, në New York (CUNY), ku kaloi shkëlqyeshëm provimin hyrës.
“Ms. Nguci është një muzikante e re me dhunti të rrallë që tashmë ka fituar në shumë konkurse si dhe gradën master qysh në moshën 16-vjeç”, thotë Norman Carey, profesor dhe drejtor i Programit të Doktoratës në Muzikë, në Qendrën e të Graduarve. “Jemi të mrekulluar që Marie-Ange ka zgjedhur që ta vazhdojë gradën e doktoratës në interpretim, në Qendrën tonë”.
Talenti i franko-shqiptares së re u shqua herët në jetë, kur në moshën 13-vjeçare fitoi konkursin e saj të parë. Ajo u nderua me Çmimin e Parë në Konkursin Ndërkombëtar të Pianos në Lagny-sur-Marne në Francë. Kohët e fundit u nderu edhe me Çmimin e Parë në Konkursin e Pianos të Çmimeve “IKIF-MacKenzie” në New York (gusht 2015).
Ajo ka fituar bursa nga Fondacioni « L’Or du Rhin» Fondacionet Meyer dhe ADAMI si dhe nga Shoqëria Franko-Amerikane e Pinos.
Gama mbresëlënëse dhe cilësia e talenteve muzikore të Marie-Ange i kanë dhënë asaj mundësinë që të zhvillojë një personalitet muzikor të pazakontë, një që e bën të kalojë lehtësisht nga soliste, në muzikante dhome apo në pjesëtare të orkestrave. Repertori i saj është shumë i gjerë dhe mbulon të gjitha zhanret e muziklës, nga klasikja dhe romantikja, te veprat bashkëkohore. (Illyria)
Mos e humbni rastin për ta ndjekur nga afër:

Pjesa:
Toccata Op. 111, No. 6…Camille Saint-Saëns (1835-1921)

Data:
E martë, 23 gusht, 2016, 11:00 a.m. deri në mesditë

Adresa:
The Graduate Center, Proshansky Auditorium
365 Fifth Avenue and 34th Street, Manhattan