Pak gjëra i bashkojnë kandidatët presidencialë, Hillary Clinton dhe Donald Trump, por një prej tyre është kundërshtimi ndaj TPP-së, një marrëveshje madhore të tregëtisë jashtme amerikane.
Këtë javë, protestës ndaj këtij projekti të Presidentit Barack Obama i janë bashkuar edhe një numër demokratësh, në Michigan, përfshi edhe kandidaten për Kongres, Suzanna Shkreli.
Nëse fiton, ndihmës-prokurorja e re do të bëhet shqiptaro-amerikanja e parë që zgjidhet në Kongresin Amerikan, nëse përjashton Joseph DioGuardin e rrënjëve arbëreshe.
Shkeli, ashtu si demokratët e tjerë në Michigan, janë në një situatë jo të lehtë. Nga në anë, mbështesin shumë prej politikave të Presidentit Obama, nga ana tjetër thellimi i tregëtisë së lirë dhe globalizmit kanë rrënuar industri tradicionale e ka humbur miliona vende pune për këtë shtet.
Një miting i mbajtur në Ann Arbor, bashkoi disa udhëheqës demokratë me përfaqësues të sindikatave punëtore për të folur kundër Partnershipit Trans-Pacifik.

Ata këmbëngulën së pasojat e kësaj marrëveshjeje tregëtare do të nxisin largimin e mëtjeshëm të vendeve të punës jashtë Amerikës.
Kongresistja Debbie Dingell është një nga ato që e kanë kundërshtuar Presidentin Obama në këtë drejtim dhe Suzanna Shkreli u vendos këtë javë, në krah të saj.
Për ironi, projektin e Presidentit Obama e mbështesin dy republikanët kundër të cilëve konkurrojnë Dingell dhe Shkreli.
Shqiptaro-amerikanja e ka kritikuar, që në ditën e parë të fushatës së saj kongresistin Mike Bishop për votën e tij që TPP-ja të miratohet me procedurë të përshpejtuar.
Ky qendrim i saj nuk do t’i prishë punë me Partinë Demokrate. Së pari, Shkreli u ka bërë një nder duke pranuar të hyjë në garë kaq vonë. Së dyti, partia vetë e di që plani i presidentit të saj nuk ka mbështetje në disa pjesë të vendit dhe distancimi nga ai është strategji e arsyeshme. Së treti, vetë Hillary Clinton ka folur kundër TPP-së, duke legjitimuar të drejtën e kandidatëve më të vegjël demokratë për të mos iu bindur Presidentit Obama në këtë pikë.
Kongresisti Bishop, i cili gjatë garës republikane mbështeti Guvernatorin John Kasich, nuk është çudi që ka mbështetur TPP-në, në Kongres. Ai këmbëngul se “fenomeni Trump” nuk do ta dëmtojë garën e tij lokale po kjo është një Parti Republikane ndryshe nga ajo, e dy vjetëve më parë, kur Bishop u zgjodh për herë të parë në Kongres.
Shkreli e ka nisur fushatën shumë vonë, po era e ndryshimit politik fryn në favor të saj. Demokratët duhej t’u kishte vajtur mendja te ajo, që në fillim dhe jo kur mbetën pa kandidaten që kishin zgjedhur. (Ruben Avxhiu)