Teknologji, 25 vjet më parë lindi sajti i parë në web

Kanë kaluar tashmë 25 vjet nga shfaqja e web-sajtit të parë të historisë: ishte data 6 gusht 1991, kur doli në dritë info.cern.ch, e realizuar nga qendra e kërkimit në Gjenevë, pasi informaticieni Tim Berners-Lee kishte depozituar në mars 1989 një dokument me idenë e tij të internetit.

Atëherë nuk ishte e qartë qasja e atij inovacioni, që në të vërtetë ka revolucionarizuar mënyrën e të jetuarit, të komunikimit, udhëtimit, të informimit dhe të të bërit blerje. Sot numërohen më shumë se 1 miliard sajte ekzistuese dhe thuajse 3.5 miliardë ndjekës që i përdorin.

Qëllimi i  Berners-Lee, ishte të krijonte një sistem për të lidhur kompjuterët e qendrës së kërkimit dhe të përcillte informacione, një farë sistemi me bazë të dhënash ‘online’, nga ku mund të përdorej në çdo kompjuter.

Menjëherë filloi puna për faqet me tekst të shkruar të lidhura me njëri-tjetrin nga një ‘link’ dhe në këto u përfshi baza themelore për web-in së bashku me ndihmën e Robert Caillau, një informaticien belg.

Lindi kështu sajti i parë në internet në Gjenevë, në një nga kompjuterët e krijuar nga Steve Jobs pas daljes nga ‘Apple’.

U punua më pas edhe për ‘browser’-in e parë, “Mozaic”, i cili shërbente për të lundruar mes ‘link’-eve të World Wide Web, ose më thjesht Web, duke krijuar kështu emrin me të cilin do të njihej më pas interneti.