Maqedoni, Ahmeti fton partitë shqiptare në takim

Kreu i Bashkimit Demokratik për Integrim, Ali Ahmeti ka ftuar udhëheqësit e të gjitha partive të tjera shqiptare në Maqedoni që t’i bashkohen një takimi të përbashkët të organizuar prej tij. Lajmi konfirmohet nga burime të brendshme të kësaj partie, të cilët kanë folur për agjencinë shtetërore të lajmeve “MIA”.

Takimi pritet të mbahet ditën e shtunë rreth orës 13 në Shkup. Ndërkohë, ftesat janë dërguar te të gjitha partitë shqiptare, pa përjashtim. Në qendër të takimit pritet të jenë zhvillimet politike në Maqedoni pas zgjedhjeve të parakohshme parlamentare të 11 dhjetorit.

Deri më tani, asnjë parti shqiptare nuk ka konfirmuar nëse do të dërgojë përfaqësues zyrtar në takimin e organizuar prej Ahmetit. Vetëm “Lëvizja Besa” ka njoftuar se do të mendohet njëherë përpara se të pranojë ftesën e udhëheqësit të BDI-së.

Vetëm një ditë më parë, njëra prej partive shqiptare në opozitë, Partia Demokratike Shqiptare, mbeti pa udhëheqës, pasi Menduh Thaçi dha dorëheqjen nga posti i kryetarit. Largimi i tij nga politika, ku ka qenë aktiv për rreth 20 vite, erdhi pas dështimit në zgjedhjet e 11 dhjetorit, ku siguroi vetëm dy mandate deputetësh. Tashmë, PDSH do të drejtohet nga Këshilli Drejtues i saj, derisa të zhvillohet Kongresi i Jashtëzakonshëm, data e së cilës do të caktohet nga Kuvendi Qendror i PDSH-së