Pajisjet teknologjike të ish televizionit Alsat pritet të dalin së shpejti në shitje në ankand publik. Përmbaruesi TDR Group ka paralajmëruar për herë të fundit në 20 shkurt palët debitorë Kuarta Shpk dhe Alsat, që të shlyejnë detyrimet, përndryshe brenda 10 ditësh do të shpallet ankandi publik për shitjen e pasurive të luajtshme të lëna peng këtu përfshihen të gjitha pajisjet teknologjike, elektronike dhe të rrjetit elektronik dhe elektrik të tashme dhe te ardhshme të barrë dhënësit, duke përfshirë por pa u kufizuar: instalimet teknike specifike me nr. Llogarie 2131+2183, skenografinë me nr. llogarie 21802, studio Skaner – Botërori 2010 me nr. Llogarie 218020 dhe pajisje zyre dhe informatike me nr. llogarie 21820, sipas Marrëveshjes Barrë Siguruese Nr.337 Rep., Nr.171 Kol., datë 17.06.2014.

Vlera e tregut e këtyre pajisjeve, sipas raport-vlerësimeve të ekspertit është rreth 142 mijë euro.

Në korrik të vitit të kaluar, shoqëria përmbaruese TDR group ka kërkuar sekuestrimin e pasurive të paluajtshme të kompanisë Kuarta dhe Alsat, me kërkesë të bankave kreditore.

Kuarta (tregtuesi me pakicë i IT Oil-Ish Taçi Oil) ka qenë një nga kompanitë më të mëdha të tregtimit me pakicë të karburanteve në vend. Në qershor 2016 kompania ka kaluar me status të pezulluar. Ndërsa në korrik mbi të kanë vërshuar një sërë urdhërash për sekuestro konservative. Kuarta u hap në vitin 2012, si tregtuesi me pakicë i shoqërisë IT Oil, që mori aktivitetin e Taçi Oil, pasi Rezart Taçit, që shiti 85% të aksioneve të ARMO-s tek azerët, iu ndalua në kontratë aktiviteti i tregtimit të naftës. Deri në vitin 2013, aksioner i Kuarta ishte Rezart Taçi, një nga sipërmarrësit më të mëdhenj të naftës deri pak vite më parë, teksa kompania e tij, Taçi Oil International, arriti të bëhej e treta më e madhe e tregtimit të naftës në vitin 2010 me një xhiro rreth 100 milionë dollarë. Në korrik të vitit 2013 u realizua shitja 100% të kuotave të shoqërisë Kuarta nga ortaku Rezart Taçi në favor të Irgen Selfo.

Alsat (edhe ai pjesë e Taçi Oil group) u mbyll në qershor 2015. Sipas të dhënave të bilancit të vitit 2013, realizoi një qarkullim vjetor prej  323 milionë lekësh në vitin 2013 (rreth 2.3 milionë euro), me një rënie prej 33% në raport me një vit më parë. Sipas xhiros, Albanian Screen ishte në atë kohë televizioni i katërt më i madh në vend, pas Top Channel, Klan dhe Vizion Plus. Për periudhën 2012-2013, televizioni rezultoi me një humbje prej rreth 30 milionë lekësh, përkatësisht për secilin vit. Edhe lista e urdhërave të sekuestros mbi Alsat është shumë e gjatë, ku një pjesë të konsiderueshmë e zënë individët (kryesisht ish punonjës), që kërkojnë sigurimet dhe pagat e prapambetura, pasi e kanë fituar këtë të drejtë në gjykatë.