Matilda Terpollari

Prej momentit kur iku nga Rilindja dhe u bë pjesë e lëvizjes më të re opozitare “LIBRA”, Ben Blushi ka fituar shumë simpati, ndjekës dhe sigurisht shumë armiq. Por ajo që është më surprizuese, mbetet ndjekësi i tij më i madh; Ai është kryetari i partisë Demokratike që sot është në opozitë. Përpjekjet e Lulëzim Bashës për të imituar Ben Blushin janë sa të çuditshme aq dhe groteske.

Kjo edhe sepse LIBRA, si parti e qendrës ka një program pa ideologji, në kuptimin klasik të fjalës. Ideologjia e saj e vetme, është të bëhet më e mira e mundshme për të gjithë ne që jetojmë në këtë vend, pa u bërë peng i ideologjive të majta e të djathta. Me sa duket, edhe PD ka vendosur të hedhë poshtë ideologjinë e djathtë të këtyre viteve të tranzicionit.

Kjo edhe për arsye se çdo interes i djathtë është i mirë përfaqësuar me konçensione te partia e majtë e Rilindjes. Ashtu si dikur, kur PD e djathtë dhe antikomuniste, bënte reformë agrare në vitet e para të demokracisë. Kjo edhe sepse teza antikomuniste e të djathtës dhe ajo e kthimit të pronave ishte një dështim i plotë.

Sot pas 26 vjetësh ajo s’mund të luftojë komunizmin, pasi askush nuk do ta besojë. Këta flamuj fushatash që u grisën, i shërbyen të djathtës për kaq shumë vite, por sot nuk vlejnë më. PD po kërkon gjetjen e një kauze të re në këtë prag zgjedhjesh. Kjo është: ”Republika e Re”. Le të ndalemi pak këtu.

Muaj më parë Ben Blushi i “LIBRA”, hodhi idenë e “Republikës 2020”. Këtë gjë e ribëri publike në takimin e tij të madh të datës 4 Shkurt me koordinatorët LIBRA-s të ardhur nga gjithë Shqipëria në Tiranë. Në këtë takim u shpalos për 1 orë programi politik dhe ekonomik i LIBRA-s me 20 pika, nën logon: “Për një Republikë të re 2020”. Një Republikë që do shkëputej nga korrupsioni, oligarkët, vrasjet dhe droga. Vese këto që janë kultivuar nga tre partitë e mëdha në tranzicion PS, PD e LSI. Në vitin 2020 “Republikën e Re” për të cilën LIBRA po lufton, do ta qeverisin shqiptarë, që do bëjnë shkëputjen e plotë nga politika e sotme dhe do ta fusin atë në binarët Evropianë me shikimin nga e ardhmja.

Pak kohë më vonë “Republikën e Re”, Basha po e promovon më së miri me të njëjtat fjalë që artikulon dhe Ben Blushi. E pazakontë kjo për një lider që kërkon të marrë pushtetin. Veçse ka një ndryshim midis tyre përtej deklarimeve që pasi artikulohen nga Blushi, pak më vonë i artikulon në mënyrë të çuditshme me të njëjtt fjalë edhe Basha.

“Republika e Re” e Bashës është Republika e 4 viteve më parë, ndërkohë që Blushi kërkon një Republikë të Re të drejtuar nga shqiptarë të rinj, të aftë dhe të arsimuar. Republika e Re e Lulëzim Bashës, në fakt është Republika e Re e udhëhequr nga njerëzit që mbajnë gjysmën e fajit për situatën në të cilën ndodhemi. Ndërsa Ben Blushi kërkon një Republikë të Re për gjithë shqiptarët pa dallim, Basha nga ana e tij i ofron shqiptarëve një “Republikë të Re” me një PD të vjetër.

Kjo është kopja e dytë që Lulzim Basha i bën Ben Blushit në mungesë të identitetit të tij. E para i përket sfidës më të madhe që LIBRA i ka bërë demokracisë së brendshme të partive politike në Shqipëri.

Në datën 6 Janar Ben Blushi artikulon një tjetër tezë të LIBRA-s,e cila u vu në zbatim në zgjedhjet e brendshme të saj. Ai është propozimi dhe vetëpropozimi i kandidatëve për deputetë si dhe votimi i tyre online.

Dhjetë ditë më vonë, Kryetari i Partisë Demokratike Lulëzim Basha artikulon të njëjtën gjë, duke deklaruar se PD-ja ka ndryshuar dhe se që këtej e tutje ajo do të zgjidhte online deputetët me propozim dhe vetëpropozim. PD- ja na ofroi si një mënyrë të sajën origjinale pikërisht atë proçes që LIBRA, e kishte ofruar ditë më parë tek anëtarët e saj. LIBRA ka qenë e para që propozoi idenë e përzgjedhjes së kandidatëve për deputet me votim online dhe e para Organizatë Politike që deri më sot nuk ka marrë asnjë vendim që nuk është votuar nga anëtarësia e saj. Mua personalisht nuk më shqetëson fakti që partia Demokratike merr idetë eLIBRA-s,më shqetëson fakti që kjo parti nuk ka një ide të vetën.

Partia Demokratike është në mes të katër rrugëve. Nuk ka drejtim, nuk ka ide përveç kopjes, ndaj sot nuk ka një alternativë. Në këto kushte a ka të drejtë morale Basha t’ju kërkojë votën qytetarëve shqiptarë që të qeverisë për 4 vitet e ardhshme? Sidoqoftë, për të mësuar se çfarë do të bëjë Lulzim Basha javën tjetër, le të presim çfarëdo të thotë Blushi të Enjten./TiranaPost.al