Qytetarët e Bullgarisë votojnë sot në zgjedhjet e jashtëzakonshme parlamentare, të cilat mbahen pasi që kryeministri Bojko Borisov nga partia e djathtë Qytetarët për Zhvillim Evropian të Bullgarisë, dha dorëheqje pas humbjes së kandidates së tyre në zgjedhjet presidenciale.

Mbi 6,8 milionë bullgarë me të drejtë vote do të ushtrojnë vullnetin e tyre në qendrat e votimit të cilat janë hapur prej orës 7 sipas orës lokale dhe pritet të mbyllen në 20:00.

Sipas anketave të fundit, partia e Borisov sërish mund të fitojë numrin më të madh të votave. Analistët vlerësojnë se kjo parti shumë lehtë mund të formojë koalicionin qeveritar, ndonëse parashikohet që kjo qeveri do të jetë jo stabile.

Borisov, kryeministri i vetëm që nga rënia e komunizmit që është zgjedhur në dy mandate, në nëntor dha dorëheqje, duke përmbushur premtimin se do të japë dorëheqje nëse kandidati i tij pëson humbje në zgjedhjet presidenciale.

Partia e tij premton luftë kundër korrupsionit, ngritjen e pagave minimale në 332 euro dhe pagës mesatare në 766,9 euro në katër vjetët e ardhshëm.

Konkurenti kryesor do të jetë koalicioni i së majtës BSP, e cila në zgjedhje hyn pas fitores bindëse të kandidatit të saj Rumen Radev në zgjedhjet presidenciale në nëntor të vitit të kaluar.

Liderja e së majtës, Kornelia Ninova tha se do të ndryshojë sistemin tatimor me vendosjen e tarifave të njëjta prej 10 për qind për të gjithë qytetarët, me përjashtim të atyre që fitojnë më shumë se 5.000 euro në muaj, të cilët do të tatimohen me 20 për qind.

Sipas analizave, partitë tjera nuk kanë ndikim të madh në situatën politike në Bullgari, e cila vlerësohet si jo stabile. Ndryshe, Parlamenti bullgar ka 240 vende.