Në Moskë është hapur një ekspozitë me foto të marra gjatë Luftës së Vietnamit ku siç raporton agjencia shtetërore “Sputnik” disa foto shfaqen për herë të parë. Ekspozita drejtohet nga kreu i Organizatës së Veteranëve Rusë të Vietnamit, Nikolai Kolesnik, i cili ishte pjesë e grupit të parë të oficerëve sovjetikë që u dërguan në ndihmë të ushtrisë vietnameze. Fotot vijnë nga arkivat e oficerëve rusë dhe paraqesin ndër të tjera edhe pilotë amerikanë të kapur rob. Mes tyre edhe senatori i njohur John McCain, pamjet e të cilit duke u kuruar përcillen nga “Sputnik”, për qëllime qartazi propagandistike. Në çdo rast pamjet japin një fragment nga ajo çfarë ishte Lufta e Ftohtë e cila vazhdon ende sot siç shohim në Siri. Pamjet mbeten interesante edhe pse i kujtojnë ndoshta presidentit aktual amerikan Donald Trump se kur tallesh me luftën duhet një çikë më shumë kujdes.