Rama i ka dhënë fund mundësisë për të zgjidhur krizën përmes rrugës së “butë” të daljes nga kriza dhe duke i provokuar qytetarët e lënë të vetmen mundësi, atë të ballafaqimit me të keqen që me shumë gjasa do të mund të shkaktonte trazira dhe destabilitet. Në këtë rast përgjegjësi i vetëm do të ishte Rama, i kapur me mish e me shpirt pas karriges së kryeministrit. Rama është i kapur pas kësaj karrigeje edhe nga frika e tmerrshme që i shkakton largimi prej saj, qoftë edhe i përkohshëm, të cilën e sheh si largim të përhershëm.

Rama, edhe mbrëmë në negociata, është treguar i gatshëm të lëshojë gjithçka përveç karriges së tij. Është treguar i vendosur të hedhë në erë gjithçka përfshi edhe stabilitetin e vendit për karrigen e tij. Të shkatërrojë pluralizimin. Të eliminojë opozitën. Të sakrifikojë aleatin më të madh. Të shkarkojë “shokun e ngushtë” të drogës dhe kanabisit Ministrin Tahiri. Të largojë si përgjegjës të gjithë drejtorët e policisë së shtetit. Të falë katër, gjashtë madje edhe të gjithë ministrat. Vetëm e vetëm që të qëndrojë në karrigen e kryeministrit. Të mos e lëshojë karrigen e kryeministrit, “lodrën” e cila e argëton por edhe i shëron sindromin “hubris” që ja zbuloi së fundmi një personazh i nderuar.

Rama nuk ka asnjë rrugë tjetër për të realizuar të vetmin synim, manipulimin e zgjedhjeve, tjetërsimin e rezultatit zgjedhor, veçse të qëndrojë i lidhur në karrigen e kryeministrit për të ruajtur lidhjet me kriminelët e narkotrafikantët, të cilat i konsideron të vetmet mjete për të ruajtur karrigen e tij.

Rama tashmë e ka të qartë dhe është shprehur brenda kupolës së tij se “po u largova nga karrigia e kryeministrit, sistemi do të na rrëzohet” që ndryshe do të thotë se i) sistemi i lidhjes së krimi me shtetin shkatërrohet; ii) sistemi i blerjes së votës me paratë e korrupsionit shpërbëhet; iii) sistemi i angazhimit të individëve me rekorde kriminale hidhet në erë; iv) sistemi i përdorimit të kanabisit dhe narkotrafikut për manipulimin e zgjedhjeve anahilohet. Prandaj është kundër një qeverie teknike/kujdestare/besimi që ka këto detyra për të realizuar; që ka mandatin kohor të arsyeshëm për të kryer këto detyra dhe ka njerëzit që krijojnë besimin e garantojnë sukses për realizimin e zgjedhjeve të lira e të ndershme.

Rama nuk është thjesht i lidhur me karrigen e kryeministrit, por në fakt është peng i lidhjeve të fuqishme të krimit me qeverinë e tij dhe atë vetë personalisht. Është i salduar me aferat korruptive që edhe gjatë këtyre ditëve e orëve të negocimit është i detyruar ti vazhdojë intensivisht. Është pazgjidhshmërisht i lidhur me kanabisin e narkotrafikun vendas e ndërkombëtar dhe i pamundur për ti shpëtuar. Duke qenë peng i këtyre lidhjeve, ai është ndër tjera edhe nën diktatin e tyre dhe i detyruar të realizojë gjithçka ata i kërkojnë qoftë edhe me koston e trazirave dhe destabilitetit të vendit. Qoftë edhe duke kërcënuar me kartën nacionaliste të destabiliteti të rajonit duke treguar se karrigia e tij ka koston e lartë jo vetëm të destabilitetit të vendit por edhe të vendeve fqinj e të rajonit duke demonstruar se pengmarrja dhe lidhjet e tij me krimin e narkotrafikun janë përtej kufijve të vendit dhe përtej trevave ku jetojnë shqiptarët.

Rama po e fut vendin në një rrugë të rrezikshme. Pluralizmi është në prag të vrasjes. Zgjedhjet e lira e të ndershme janë projektuar të eliminohen. Opozitën kërkon ta shkatërrojë dhe qytetarët ti nënshtrojë. Trazirat dhe destabilieti, i vendit e rajonit, janë karta që Rama po luan për të kërcënuar shqiptarët dhe tërhequr vëmendjen e ndërkombëtarëve. Dhe të gjitha këto thjesht për “karrigen” mbi të cilën është ulur pazgjidhshmërisht Rama, jo vetëm nga i sëmurë rëndë nga sindromi “hubris” por ndër të tjera i marrë peng edhe nga krimi, korrupsioni dhe narkotrafiku./SYRI/