Rober Berns: Koh’ e bukur që vate

Do t’i kushtojmë dhe një grimë,
Ah, kohës që na pat kaluar –
Një grimë t’ëmbël miqësie,
Ah, kohës që na pat kaluar.

Ne patëm mbledhur margarita
Mi male e brigje të bleruar,
Po shumë shpesh u patëm lodhur
Pas kohës që na pat kaluar.

U lamë, u lyem nëpër lumë
Mes diellit të përvëluar,
Po det’ i keq përplasi valat
Pas kohës që na pat kaluar.

Ja dora ime e nepma tënden,
O miku im i adhuruar,
Dhe le të pimë të pangopur
Për kohën që na pat kaluar.

Duk’ e shtrënguar fort ti kupën,
Dhe unë fort duk’ e shtrënguar,
Të pimë sot për dashurinë,
Për kohën që na pat kaluar.
Shqipëroi Lasgush Poradeci.