Sondazhi i dytë i IPR me 800 vete nxjerr PS forcë të parë në zgjedhjet e 25 qershorit
Një sondazh i IPR i porositur nga RTV Ora News, sugjeron se zgjedhjet e 25 qershorit do të sjellin mbështetje më të madhe për Partinë Socialiste dhe pas saj, për PD dhe LSI. Sondazhi i kryer me telefon në rreth 800 vetë, vlerëson se 59.1% e tyre do të shkojnë të votojnë të 25 qershor ndërsa 33.7% se nuk do të shkojnë të votojnë dhe 7 % janë të pavendosur. Nëse zgjedhjet do të zhvilloheshin këtë javë që u zhvillua ky sondazh, Partia Socialiste do të fitonte rreth 45.0 % të votave. Në vend të dytë, renditet Partia Demokratike, me 37 për qind, ndërsa në vend të tretë renditet Lëvizja Socialiste për Integrim me 13% të votave. Krahasuar me sondazhin e javës së shkuar, atë të 31 majit, po nga IPR, Partia Socialiste është rritur me 2%, Partia Demokratike me 1 për qind, e po aq edhe Lëvizja Socialiste për Integrim. Krahasuar me zgjedhjet e vitit 2013, të gjitha partitë kryesore kanë pësuar rritje, pasi atëherë, Partia Socialiste rezultonte 41.4 për qind, Partia Demokratike, 30.6 për qind dhe Lëvizja Socialiste për Integrim 10.5 për qind. Rritjen më të madhe e ka pësuar Partia Demokratike, duke marrë rreth 7% më shumë vota.
Rezultatet e sondazhit në tre qarqe
Në qarkun Elbasan sipas orientimit të votës: PS merr 7 mandate, PD 4 mandate, LSI 1-2 mandate. PDIU dhe LIBRA luftojne per 1 mandat.
Në qarkun Durrës sipas orientimit të votës: PS merr 6 mandate, PD 5 mandate, LSI 1-2 mandate. LIBRA e PDIU mund të fitojnë 0- 1. Në Durres janë 18. 5 % elektorati i pavendosur.
Ne qarkun Fier sipas orientimit te votes, PS mund të marrë 9- 10 mandate, PD 4-5 mandate, LSI 1-2 mandate. LIBRA e PDIU mund të fitojnë nje mandat ose asnje. Ne Fier 12. 5 % jane të pavendosurit.
Orientimi i votes ne Qarkun e Elbasanit
Nëse qytetarët e Elbasanit do të votonin sot, Partia Socialiste do të dilte forcë e parë në këtë qark me 49.5% të votave. Ndërkohë Partia Demokratike pozicionohet e dyta me 29.5% të votave nga 27% që kishte marrë në 2013, duke rrëmbyer katër mandate deputetësh. LSI shënon rënie në Elbasan. Ka marrë 10% të votave nga 10.6% në 2013. Merr 1-2 mandate deputetësh. Rënie ka dhe PDIU që ka marrë 5.5% të votave nga 7.0 në 2013. Lufton për një mandat deputeti. Edhe LIBRA e Blushit ka pritshmëri në këtë qark, ka marrë 3% të votave dhe lufton për një mandat. Rënie ka Partia Republikane, nga 3.6% të votave që ka marrë në 2013 në këtë sondazh merr vetëm 1% të votave, duke mos kaluar pragun elektoral.
Orientimi i votes ne Qarkun e Durresit
Nëse qytetarët e Durrësit do të votonin sot, PS do të merrte 42.2% të votave ose 6 mandate deputetësh nga 14 deputetë në total që ka qarku. Nga rezultatet e sondazhit të Ora News dhe IPR Marketing të publikuar në Tonight Ilva Tare vihet re një rritje e PS krahasuar me 2013 ku ka marrë vetëm 39.2% të votave. E dyta renditet PD me një mandat më pak, ku ka marrë 35.5% të votave ose 5 mandate. në 2013, PD ka marrë 34% të votave. Ndërkohë LSI ka marrë 12% të votave, ku lufton për 1-2 mandate. Në 2013 ka marrë 7.5% të votave. LIBRA e Blushit lufton edhe në këtë qark për një mandat deputeti. Ka marrë 3.1% të votave. Për një mandat lufton edhe PDIU me 3% të votave nga 2.4% që ka marrë në 2013. Rënie të madhe ka PR që ka marrë vetëm 1% të votave nga 6.8% në 2013. Nuk merr asnjë mandat. Poshtë pragut elektoral pozicionohen të gjitha partitë e tjera të vogla.
Qarku i Fierit konfirmon bindjet e majta
Ky është rezultati i sondazhit të Ora News dhe IPR Marketing sipas të cilët nëse qytetarët fierakë do të votonin sot, PS do të merrte 54.7% të votave ose 9-10 mandate deputetësh nga 16 në total që ka ky qark. Krahasuar me 2013, PS ka një rritje në përqindje. Në 2013 kishte marrë vetëm 44.2%. Partia Demokratike do të merrte vetëm 24.7% ose 4-5 mandate. Në 2013 demokratët kishin marrë 22.9%. LSI ka marrë vetëm 9.6% të votave ose 1-2 mandate. Në 2013 mori 9.7% të votave. LIBRA e Blushit ka marrë 3.6% të votave ose 0-1 mandate. PDIU 3% të votave ose 0-1 mandate. Kjo parti ka një rënie krahasuar me 2013 ku kishte marrë 4.5% të votave.
