Kisha në lagjen e Shqipërisë së Vogël, në Bronx – tani me një statujë të Nënë Terezës

Me sponsorizimin e veprimtarit Harry Bajraktari dhe familjes së tij

Nga Ruben Avxhiu

Që nga e diela, një statujë e Nënë Terezës zbukuron Kishën Katolike “Zonja Jonë e Malit Karmel” në lagjen Belmont, në Bronx, New York, e famshme edhe për përqendrimin e madh të bizneseve dhe organizatave shqiptare.
Vendosja e statujës – në kuadrin e rinovimit të kishës tashmë më shumë se 100-vjeçare – u përurua me një ceremoni, për të cilën kishte ardhur nga Shqipëria, Ambasadori i Papës (Nuncio) në Shqipëri, Arqipeshvki Charles Brown.
Sponsorizimi i statujës së Nënë Terezës u bë nga veprimtari i njohur i komunitetit shqiptaro-amerikan, Harry Bajraktari, i cili mbajti edhe një fjalim me këtë rast.
Në ceremony merrte pjesë edhe Asambleisti i parë shqiptaro-amerikan për Shtetin e New York-ut dhe kandidati për në Këshillin Bashkiak të Qytetit, Mark Gjonaj.
Nisma për rinovimin e kishës erdhi nga At Jonathan, famullitari i Kishës Zonja Jonë e Malit Carmel. Ai gjeti mbështetje nga komuniteti i kishës dhe i lagjes, jo vetëm nga katolikë po edhe nga të tjerë, përfshi edhe shqiptarë të besimit mysliman.
Kjo është një lagje e rëndësishme për shqiptarët. E njohur për gati një shekull si “Little Italy”, disa kanë filluar ta quajnë edhe Little Albania, për shkak të numrit në rritje të bizneseve dhe banorëve shqiptarë.
Rruga kryesore e saj Arthur Avenue është shumë e njohur dhe e dashur për shqiptarët. Në një rrugë paralele me të, në Hughes Avenue, kanë qenë zyrat e gazetës “Illyria”, për shumë se një dekadë. Themeluesi i gazetës, Harry Bajraktari ka qenë nj nga biznesmenët që luajti rol në ringjalljen e seksionit të Belmontit në Bronx.
Për më shumë se një shekull, Kisha në fjalë ka qenë një nga shtyllat e këtij komuniteti në ditë të mira e të këqia.
Në fjalën e tij, Harry Bajraktari falenderoi familjen për mbështetjen që i kishte dhënë dhe shprehu kënaqësinë e shqiptaro-amerikanëve që kisha në lagjen e tyre ishte zbukuruar me statujën e Shën Terezës të Kalkutës.
“Nënë Tereza, siç e thërrasim ne, është shenjtore e Kishës Katolike dhe humanitare e madhe e gjithë botës, por ajo është edhe një vajzë e kombit shqiptar dhe ne jemi shumë krenarë për të”, tha Harry Bajraktari i duartrokitu nga pjesëmarrësit.
“E ka thënë vetë me gojën e saj… nga gjaku jam shqiptare…”, tha ai, duke lexuar citation tashmë të famshëm të Gonxhe Bojaxhiut.
“Ne shqiptarët jemi një komb me shumë fe, por jemi krenarë për harmoninë dhe bashkimin nërfetar. Edhe Nënë Tereza u shërbeu të gjithëve, pavarësisht se cilës fe i përkisnin. Në këtë mënyrë n aka frymëzuar të gjithëve. Jo më kot, myslimanë e katolikë u bashkuan për të ndihmuar rinovimin e kësaj kishe në këtë lagje bukur të larmishme”, tha Bajraktari.
Ai kujtoi vizitën e Nënë Terezës, në Bronx, dhe e quajti statujën e re, një rikthim të saj në zemër të komunitetit.
Harry Bajraktari i ftoi pastaj të pranishmit që ta përshëndesnin me një durtrokitje mikun e ditës, Ambasadorin e Papës në Shqipëri, që veç të tjerash është i lindur e rritur në New York e që ka shërbyer dikur në rini, në Bronx.
Vetë Arqipeshkvi i njohur Charles Brown, mik personal i Papa Ratsingerit, nuk i kurseu fjalët e bukura për shqiptarët.
Ai tha se ndihej krenar që shërbente në Shqipëri dhe përmendi të paktën dy elementë që siç u shpreh ai duhej t’i bënin shqiptarët që të ndiheshin krenarë.
E para ishte harmonia ndërfetare, të cilën ai tha se Papa Françesku ia kishte përmendur personalisht kur e ngarkoi me detyrën e Nuncios në Shqipëri dhe e deta, qëndresa e martirëve katolikë ndaj regjimit diktatorial komunist.
Edhe shqiptarët në Amerikë duhet të ndihen krenarë për këto, u shpreh ai.
Ambasadori i Papës e quajti Nënë Terezën “vajzë të kombit shqiptar” dhe dëshmoi se kishte parë nderimin që shqiptarët ruajnë për të, jo vetëm katolikët port ë gjithë bashkatdhetarët e jo vetëm në Shqipëri, po kudo ku jetojnë në Kosovë, kudo në Ballkan e në mërgim.

Më poshtë vijon një kronikë e Televizionit 21 e përgatitur nga gazetari Halil Mula.