Regjisori Tarantino “vjen” në Tiranë

I konsideruar si një nga regjisorët më me ndikim në kinematografinë botërore të fundit të shek. XX dhe fillimit të atij XXI, Quentin Tarantino do të mund të shihet çdo ditë tashmë nga qytetarët e Tiranës.

Teksa mund të ecin përgjatë rrugëve, qytetarët e Tiranës do të mund të shikojnë të realizuar në një vepër arti portretin e regjisorit, aktorit, producentit amerikan, filmat e të cilit janë aq ndikues, saqë kritika ka krijuar një emërtesë të re për stilin e tij: tarantinoesque. Pak kohë më parë Bashkia e Tiranës nisi një projekt që realizohej për herë të parë në Shqipëri, ku ndërmarrja e dekorit ka zbukuruar të gjithë kutitë e energjisë ose ato telefonike që ishin në rrugët e kryeqytetit, duke i shndërruar ato në vepra të mirëfillta arti.

Punonjës të ndërmarrjes së dekorit kanë pikturuar personazhet vizatimorë më të dashur për fëmijët. “Nga Peter Pan tek Princi i Vogël, qoshkat e Tiranës kanë diçka për çdo vogëlush që ndjek personazhet e preferuara në qytet. Ditë të mbarë”, shkruan Veliaj në twitter teksa ka postuar edhe fotot e realizuara në rrugët e kryeqytetit.