Twitter mbyll gabimisht llogarinë e Trump

Llogaria në Twitter e Presidentit Donald Trump është mbyllur. Kaq ka mjaftuar për të shkaktuar panik. Menjëherë kompania tha se ishte një gabim njerëzor dhe se kjo gjë ishte e përkohshme. Por, në një komunikim të dytë, u publikua se mbyllja e llogarisë së Presidentit ishte bërë qëllimisht nga një punonjës.

Sipas tyre ky ishte veprimi i papërgjegjshëm i një punonjësi që kishte ditën e tij të fundit të punës dhe se janë duke hetuar çështjen.

Gjatë zgjedhjeve dhe qëkur u zgjodh president, Trump e ka përdorur Twitter-in për të komunikuar gjithçka. Që nga shaka ironike e deri në lajmërime të rëndësishme politike. Disa prej postimeve të tij, kanë prekur shumë grupe individësh, të cilët e kanë kritikuar për ofendime dhe racizëm. Por, teksa llogaria e Trump qëndroi për 11 minuta e mbyllur, kaq ka mjaftuar që rrjeti të shpërthejë në humor.

“Trump mendoi se fshirja e llogarisë në Twitter, është e njëjtë më heqjen dorë nga presidenca”.

“Shpresoj që një ditë, dikush të bëjë një film për këto pak minuta, kur e gjithë bota ishte e lumtur”.

“Jemi te lirë”.