Media: Evolojnë hetimet ndaj ish-këshilltarit Flynn

Shtypi amerikan njoftoi se ekipi ligjor që përfaqëson ish-këshilltarin e Sigurisë Kombëtare të presidentit, Michael Flynn, nuk po shkëmben më informacione me Shtëpinë e Bardhë, lidhur me hetimet në vazhdim mbi ndikimin e Rusisë në zgjedhje.

Dje gazeta “New York Times” njoftoi se përfundimi i marrëveshjes për të shkëmbyer informacion mund të nënkuptojë që zoti Flynn po bashkëpunon me Prokurorin e Posaçëm Robert Mueller. Ky i fundit po heton ndërhyrjet e mundshme të Rusisë në zgjedhjet presidenciale amerikane të vitit 2016 si dhe çdo lidhje të mundshme mes zyrtarëve të fushatës së zotit Trump dhe Moskës.

Michael Flynn dha dorëheqjen nga administrata në muajin shkurt pasi u zbulua se kishte gënjyer lidhur me një bisedë që kishte patur me ambasadorin rus në Shtetet e Bashkuara.

Zoti Flynn, një mbështetës i fortë i zotit Trump gjatë fushatës, ka qenë një figurë kryesore në hetimet që po kryhen nga prokurori i posaçëm Mueller.