Tryezë debati rreth “Ligjit italian kundër shpërdorimit të ushqimit dhe impakti mbi varfërinë”

Qendra Europiane e Shkencës për Paqe, Integrim dhe Bashkëpunim (CESPIC), pranë Universitetit Katolik “Zoja e Këshillit të Mirë”, organizon të hënën, më 4 dhjetor 2017, ora 10:00, tryezën e rrumbullakët të titulluar “Ligji italian kundër shpërdorimit të ushqimit dhe impakti mbi varfërinë”.

Në event do të diskutohet çështja e parandalimit të mbetjeve ushqimore për të garantuar sigurinë ushqimore dhe për të luftuar varfërinë. Në veçanti do të analizohet ligji i ri italian kundër shpërdorimit të ushqimit (n.166/2016), i cili pati sukses brenda një kohe të shkurtër që nga zbatimi i tij dhe që po shndërrohet në një model legjislativ në gjithë Europën.

Italia u bë vendi i parë në BE që miratoi një ligj, që nxit kompanitë të dhurojnë për bamirësi ushqimet e pashitura. Deputetja e Parlamentit të Italisë, Maria Chiara Gadda vjen në eventin e organizuar nga CESPIC për të përshkruar sfondin, motivimin, përmbajtjen dhe arritjet e këtij ligji, që ajo inicioi në vitin 2016.

Por, a do të mund të aplikohet ky ligj edhe në kontekstin shqiptar dhe si mund të realizohet implementimi i tij?

Eventi do të zhvillohet pranë Aula Magna-s të Universitetit Katolik “Zoja e Këshillit të Mirë”, Tiranë, si edhe do të transmetohet live streaming në facebook, në adresën Universiteti Katolik Zoja e Këshillit të Mirë.