Ish-doganieri i LSI ‘shpërblehet’ me tender nga Bashkia Shkodër

Në prag të festive të fundvitit, Bashkia Shkodër ka vendosur që të shpërblejë me një tender për pajisjen e zyrës së informacionit në Theth me materiale funksionale dhe promocionale një ish-doganier të LSI-së, të liruar nga detyra në vitin 2014, pas një procesi gjyqësor për shpërdorim detyre.

Tenderi midis Bashkisë së Shkodrës së drejtuar nga Voltana Ademi dhe Tufik Kurtit, sipas dokumentacionit të siguruar prej Lexo.al është lidhur në datën 22 dhjetor 2017.

Zoti Kurti është shpallur fitues, ndonëse kompania e tij, sipas përshkrimit të regjistruar në QKR është një kompani që merret me tregtimin e luleve, e pjesëve të këmbimit për makina, përpunim druri dhe organizimi eventesh, etj.

Larmia e jashtëzakonshme e shërbimeve të ofruara prej kësaj kompanie me aksioner të vetëm ish-doganierin e LSI duket se përdoret vetëm për të lejuar Kurtin që të konkurrojë në sa më shumë tendera publikë, pasi identifikimi i shërbimeve të tij në terren është i pamundur të identifikohet.

Emri i Kurtit u bë për herë të parë i njohur në vitin 2014, kur ish-kryetari i Kuvendit, Ilir Meta lidhi me firmën e Kurtit një kontratë publike për shëbrime kateringu, një tjetër specialitet në të cilën Kurti nuk është aspak i specializuar.

Kontrata midis Kuvendit dhe Kurtit, për “shërbimet e tij të kateringut” u lidh në 2 tetor 2015.

Sipas një investigimi të “Lexo.al”, Kurti u lirua nga detyra si doganier për shkak të shkeljeve të verifikuara në punë në vitin 2014, por ai apeloi me sukses kundër shkarkimit dhe ndonëse Gjykata e Apelit e la shkarkimin e tij në fuqi, ai u shpërblye me tetë paga dëmshpërblim në vitin 2015.

Në të shkuarën, Kurti është gjykuar edhe për shpërdorim detyre, në kohën kur ai punonte si doganier në pikën doganore të Bllatës, në Dibër. Pavarësisht shkeljeve të provuara nga Prokuroria, Gjykata e Dibrës vendosi që ta linte atë të lirë në vitin 2010.