Apeli lë në burg Dashamir Xhikën dhe dy ish-zyrtarët

Apeli i Krimeve të Rënda ka lënë në burg ish-kreun e Autoritetit Rrugor Shqiptar Dashamir Xhika dhe dy ish-zyrtarët e tjerë. Seanca e sotme ka nisur rreth orës 13:30 ku u komunikua edhe vendimi për tre ish-zyrtarët.

Arrestimi i Dashamir Xhikës dhe disa ish-zyrtarëve të Rrugëve, përfshi edhe Andi Tomën, ish-drejtor i Përgjithshëm të Rrugëve nga viti 2008-2013, u bë me urdhër të prokurorisë si të dyshuar për një dëm të madh të shkaktuar nga projekti i rrugës Elbasan-Gjinar.

Dashamir Xhika dhe 2 ish-vartësit e tij akuzohen për korrupsion pasiv dhe shpërdorim detyre.

Hetimet për rrugën Tiranë-Elbasan tek Krimet e Rënda nisën pas kallëzimit të ministrisë së Infrastrukturës dhe Energjisë në 27 dhjetor 2017.

Ky dikaster bëri padi pasi auditoi përdorimin e fondeve në këtë vepër të infrastrukturës. Deri tani për llogari të këtij hetimi janë arrestuar tre ish-zyrtarë të drejtorisë së rrugëve.

Ata akuzohen për “shpërdorim detyre” në lidhje me rrugën Tiranë-Elbasan, duke i shkaktuar një dëm prej 54 milionë dollarësh buxhetit të shtetit.