Miranda Içi: Mos më beso

Mos më beso
kur të them se skuqem
nga lakmia e vështrimeve të tua.
Të mashtroj jam frut,
dua të kafshohem pa më ardhur koha.

Mos më beso
kur të them se më tretin
dehjet e tua marramendëse .
Është trill i dëshirës,
merr frymë nga poret e mia .

Mos i beso vetes se je ujk i vjetër.
Dhe unë pre e dinakërive të tua.
Vishem si Kësulëkuqe,
kur dua të ndjej dhëmbë të mprehtë,
të ngulen uritur,mishit tim të purpurtë.

Gënjejmë dhe gënjehemi.
Luajmë simfoni të përsosura furtunash.
Shkruar mbi trup, trazuar në shpirt.
Eksplorojmë brigje të panjohur,
të ndjejmë se ekzistojmë
mes drithma batica-zbaticash… mjerane.

28/2/2016