Zvicra prezanton strategjinë e re të bashkëpunimit me Shqipërinë për 2018-2021

Dokumenti i publikuar sot paraqet drejtimet ku do të shpenzohet buxheti i asistencës zyrtare zvicerane prej rreth 90 milion Euro për Shqipërinë në katër vitet e ardhshme

Gjatë një aktiviteti lançues sot tek Hotel Rogner përfaqësues nga qeveria zvicerane dhe ajo shqiptare prezantuan strategjinë e re për mbështetjen e Shqipërisë gjatë periudhës 2018-2021. Në pjesën e parë përshëndeti edhe Sekretarja Zvicerane e Shtetit për Çështjet Ekonomike Marie-Gabrielle Ineichen-Fleisch e cila po viziton vendin për herë të parë. Para aktivitetit Sekretarja e Shtetit Ineichen-Fleisch u takua me Presidentin Ilir Meta, Kryeministrin Edi Rama dhe Ministrin e Financave dhe Ekonomisë Arben Ahmetaj.

“Strategjia e bashkëpunimit që po paraqesim sot përmbledh disa projekte të cilat në mënyrë direkte ose indirekte kontribuojnë për përmirësimin e klimës së investimeve në Shqipëri”, tha zj. Ineichen-Fleisch. Ajo përmendi se strategjia e re është një ‘shenjë e rëndësisë së marrëdhënies sonë me Shqipërinë’.

Ambasadori zviceran Christoph Graf tha: “Strategjia e re e vë theksin tek rezultatet dhe zbaton qasjen e ‘të bazuarit mbi performancën’. Mbështetja zvicerane jepet aty ku ka aksion dhe përgjigje. Jemi të bindur që kjo qasje ndihmon që të ketë qëndrueshmëri. Zvicra mbështet Shqipërinë në integrimin europian duke kontribuar për një demokraci funksionale, shërbime publike të përmirësuara, dhe një ekonomi tregu gjithëpërfshirëse dhe konkurruese”.

Zv. Kryeministrja Senida Mesi përshëndeti aktivitetin në emër të qeverisë shqiptare dhe tha: “Strategjia e mëparshme 2014-2017 por edhe strategjia për të cilën po flasim sot janë një dëshmi e qartë e bashkëpunimit mjaft të mirë ndër vite midis vendeve tona. E përgëzoj lançimin e kësaj strategjie dhe të gjithë mbështetjen zvicerane pasi ka si qëllim të çojë përpara projekte në funksion të zhvillimit makroeonomik, shoqëror dhe politik në Shqipëri”.

Dy përfituese të reja folën mbi përvojat e tyre me asistencën dhe financimin nga projekte zvicerane në fushat e aksionit civil dhe të sipërmarrjes.

Strategjia e re e bashkëpunimit thekson ‘gjithë-përfshirjen’ në shumë aspekte të saj – demokratike, politike, dhe sociale – dhe ri-përcakton katër fusha ku do të përqendrohet asistenca zvicerane. Të paktën dy fusha të reja do të marrin mbështete zvicerane: (i) institucionet ligjore –parlamenti dhe këshillat bashkiake; dhe (ii) efiçensa e energjisë. Në fokus do të vazhdojnë të jenë punësimi dhe qeverisja vendore.

Rreth 90 milion Euro do të mbështesin punën zhvillimore në fushat e mësipërme me rreth 37% që shkojnë drejt qeverisjes demokratike, dhe 28% drejte zhvillimit ekonomik dhe punësimit. Përmirësime të ndjeshme parashikohen në rrjetet e furnizimit me ujë në të paktën 7 bashki përfshirë Beratin dhe Gjirokastrën – të dyja qytete të rëndësishme turistike.

Shqipëria është vend prioritar për bashkëpunimin dhe asistencën ndërkombëtare zvicerane dhe aktualisht Zvicra është donator i tretë më i madh dy-palësh në Shqipëri.