Carl Icahn, gjeniu amerikano-hebre i investimeve në SHBA
“Carl Icahn është një nga investitorët më të suksesshëm të Wall Street për dekada”.
Ky është vlerësimi që i bën revista “Forbes”, Carl Icahn, 82-vjeçarit amerikano-hebre, i cili aktualisht ka një pasuri prej 16.9 miliardë dollarë.
Icahn, i cili është njeriu i 27-të në SHBA dhe i 55-ti më i pasur në botë, njihet për aftësinë e tij të jashtëzakonshme, për t’i shndërruar biznese thuajse të dështuara apo në rënie e sipër, në sipërmarrje me vlera të dhjetëra fishuara, por edhe një biznesmen që ble lirë dhe shet shumë shtrenjtë aksione.
Themeluesi i Icahn Enterprises është jo vetëm biznesmen dhe investitor, por dhe një filantropist i madh.
Në dhjetor 2016, Presidenti i SHBA-ve, Donald Trump, i kërkoi Icahn të ishte këshilltari i tij ekonomik special për rregullimet financiare brenda administratës së tij, rol që e luajti deri në gusht të vitit 2017.
Icahn u rrit në një familje hebreje, në Nju Jork. Prindërit e tij, Michael dhe Bella Icah ishin të dy mësues shkolle, babai i tij ishte më parë këngëtar në një sinagogë. Ai u diplomua si “Baçelor” për filozofi në Universitetin Princeton – Carl i dhuroi më vonë 5 milionë dollarë – , dhe më pas hyri në Shkollën Mjekësore në New York University, por që e la pas dy vjetësh për t’u bashkuar me ushtrinë rezervë.
Icahn e nisi karrierën e tij Wall Street si një broker stoqesh në vitin 1961, kur ai ishte 25 vjeç, ndërsa në moshën 32 vjeçare (1968), ai themeloi firmën e tij të sigurimeve Icahn & Co, të fokusuar në arbritrazhet e riskut dhe opsionet e tregtisë.
Ai është një nga investitorët më të mirënjohur dhe me influencë në Amerikë.
Në vitin 1978, ai filloi të blinte përqindje thelbësore dhe disa herë edhe kontrolluese në kompani individuale. Gjatë viteve ai pati përqindje apo dhe paketa kontrolluese në kompani të tilla si RJR Nabisco, Texaco, Phillips Petroleum, Western Union, Gulf & Western, Viacom, Uniroyal, Dan River, Marshall Field, E-II (Culligan and Samsonite), American Can, USX, Marvel, Revlon, ImClone, Fairmont, Kerr-McGee, Time Warner, Yahoo!, Lions Gate, CIT, Motorola, Genzyme, Biogen, BEA Systems, Chesapeake Energy, El Paso, Amylin Pharmaceuticals, Regeneron, Mylan Labs, KT&G, Lawson Software, MedImmune, Dell, Herbalife, Navistar International, Transocean, Take-Two, Hain Celestial, Mentor Graphics, Netflix, Forest Laboratories, Apple dhe eBay.
Icahn njihet për blerjet e bujshme të aksioneve në kompanitë më të mëdha amerikane. Ai ka aksione me një vlerë prej 8 miliardë dollarë tek gjiganti Apple.
Ai ka dhe një statium “Icahn Stadium” në Nju Jork.
Icahn ka themeluar fondacionin e tij, Children’s Rescue Fund, i cili ka ndërtuar edhe një bllok ndërtesash, ku u vjen në ndihmë të pastrehëve, nënave me fëmijë që kërkojnë strehim.
Në vitin 2016, Icahn dhuroi 1 milion dollarë për grupet e veteranëve të SHBA-ve, një “fundraiser” i organizuar nga Donald Trump.
Icahn është nderuar me një numër të madh medaljesh. Icahn është martuar dy herë, fillimisht (1979 )me balerinën nga ish-Çekosllovakia, Liba Trejbal, me të cilën pati dy fëmijë dhe pas divorcit (1999), ai u martua me asistenten e tij, Gail Golden.