28 eurodeputetët, letër Thaçit e Haradinajt për “gylenistët”

28 deputetë të Parlamentit Europian, nga grupime të ndryshme politike, kanë firmosur një letër të përbashkët dhe ua kanë dërguar presidentit të Kosovës, Hashim Thaçi, si dhe kryeministrit Ramush Haradinaj. Nismëtarë të kësaj letre janë slloveni Igor Šoltes dhe eurodeputetja gjermane Rebecca Harms Stoltes thotë në një mesazh në Twitter se me këtë letër ata u shprehin drejtuesve të Kosovës shqetësimin për fatin e gjashtë shtetasve turq, të arrestuar në Kosovë e të dëbuar në Turqi pa kaluar faza gjyqësore. “Si pjesëtarë të Parlamentit Europian, ju bëjmë thirrje të respektoni procedurat ligjore sipas standardeve europiane. Të gjitha masat e marra nga autoritetet kosovare duhet të respektojnë rendin ligjor dhe të promovojnë respektin universal për liritë dhe të drejtat e njeriut. Procedura arbitrare për arrestimin dhe dëbimin e tyre janë shkelje e këtyre parimeve”, thonë eurodeputetët në letrën e dërguar presidentit Thaçi dhe kryeministrit Haradinaj.