Horoskopi javor, 13-19 gusht 2018
Dashi
Teksa ju jeni duke përjetuar momentin kyç të kësaj vere, plot kontradikta dhe shpresa për stinën e vjeshtës, dikush pranë jush mund të kërkojë diçka më tepër, me gjasë përgjigje apo konfirmime. Pra, yjet nuk e përjashtojnë mundësinë që të lindurit në shenjën e Dashit të gjenden përballë personave polemikë, të cilët nuk falin siguri dhe qetësi dhe kërkojnë gjithmonë përgjigje tejet të vështira. Ndodh kështu deri në fundjavë, kur Jupiteri i favorshëm do t’ju rikthejë entuziazmin dhe motivimin për t’u përshtatur me stinën e verës dhe personat e pazakontë që e shoqërojnë atë.
Demi
Ju e shfrytëzoni më së miri qetësinë dhe gjakftohtësinë që ju karakterizon për t’u mbrojtur, po ashtu edhe ngadalësinë që, në ditët në vijim, mund t’u japë një përgjigje të përsosur të gjithë atyre që ju bëjnë shumë pyetje. Sepse, nëse Plutoni, të martën, do të ngjallë brenda jush dyshime të pabazuara dhe të pakuptimta, Jupiteri, të enjten, do të mundohet t’i japë fund optimizmit në shenjën tuaj. Pra, duhet të përpiqeni që të mbroheni këtë verë nga sulmet e planetëve që mbjellin dyshime dhe mosbesim te vetja juaj dhe te të tjerët. Doni një këshillë? Në fundjavë kërkojini mendim personave të tretë, sepse ata, ndryshe nga ju, do të gjykojnë me objektivitet.
Binjaket
Duke qenë se kjo është java kulmore e stinës së verës, të lindurit e shenjës suaj, që karakterizohen nga intuita e mprehtë, do të dinë të përshtaten me gjendjen aktuale. Kështu, nuk do t’i lejoni planetët kaotikë që të prishin çlodhjen absolute të pushimeve të shkëlqyera. Dikush mund të ketë dëshirë që të ngjallë polemika apo të ndërlikojë ndonjë situatë ose projekt që, teorikisht, duhej të shërbente për t’i dhënë nuanca argëtimi dhe adrenaline kësaj stine të qetë. Reagoni me kthjelltësi deri në fundjavë, kur do të gjeni sërish pasionin dhe aftësinë për t’i thjeshtësuar gjërat. Sepse kështu e do kjo punë.
Gaforrja
Keni bërë pushime të gjata. Në fakt, ky është momenti më i bukur i stinës së verës, falë një qielli mjaft të favorshëm në shenjën tuaj, i përbërë vetëm nga Afërdita që stimulon gjërat e thjeshta dhe spontane. Kjo liri mund të cenohet gjatë ditëve në vijim nga disa dyshime dhe dilema (me gjasë të martën) që vijnë për shkak se ju nuk besoni që e ardhmja do të jetë miqësore me fatin tuaj (do të ndodhë mes të mërkurës dhe të enjtes). Megjithatë, po ta shikoni me vëmendje, mund të jetë thjesht një iluzion optik si pasojë e gjendjes emocionale. Ndaj, nuk ia vlen të stepeni nga frika. Qetësia dhe optimizmi do të zënë vend prej të dielës në shenjën tuaj.
Luani
Pikërisht teksa ju po i gëzoheni stinës së favorshme, kur energjitë e kozmosit ngjasojnë së tepërmi me mënyrën tuaj të të qenit dhe ju bëjnë të ndiheni tejet të fuqishëm, mund të paraqitet një sfidë jo fort e lehtë. Sa keq! Problemi juaj mund të ketë të bëjë me raportin me të ardhmen, ose më saktë, me aftësinë tuaj konkrete për t’u dhënë pas gjërave që do të vijnë dhe që do t’ju shoqërojnë pas pak kohësh.
Gaboheni, në fakt! Shmangni dyshimet dhe dilemat e stilit të Otellos që ta kaloni të pacenuar javën më të nxehtë të verës. Qëndroni larg debateve dhe bisedave me polemika dhe prisni fundjavën, kur Jupiteri do ta rikthejë vëmendjen tuaj te diçka pozitive dhe konkrete.
Virgjëresha
Pse duhet të ndërmerrni aventura thuajse të pamundura, kur e dini që s’i keni idetë të qarta dhe që edhe ju vetë keni nevojë për ndihmë, për përgjigje dhe për konfirmime? Vendim me mend do të ishte që ta linit një person të afërt me ju t’i zgjidhte vetë problemet e veta dhe të përballet vetë me mëdyshjet e brendshme, ndaj të cilave ju nuk keni se ç’të bëni. Cila është arma juaj? Durimi, aftësia për të pritur konfirmime dhe zhvillime të reja. Kështu, do ta përmirësoni gjendjen shpirtërore të momentit. Këtë gjë do të vëreni edhe me qartë në fundjavë, kur pasioni dhe entuziazmi do të rikthehen hareshëm në të tashmen tuaj.
Peshorja
Ndonjëherë, nuk është mirë të ndiheni tejet të rëndësishëm dhe vendimtarë, sepse rrezikoni ta mbivlerësoni veten dhe të ushqeni në mënyrë të pabazuar ndjesi dhe përshtypje jo fort konstruktive. Afërdita ju shtyn që të përjetoni çdo ngjarje me vendosmëri, në mënyrë të dukshme dhe duke i kushtuar shumë rëndësi, por ky mund të shndërrohet në një realitet të sikletshëm. Sepse, Jupiteri dhe Plutoni, gjatë ditëve në vijim, do t’ju bëjnë të ndiheni të pafuqishëm përballë disa situatave që do të paraqiten si tejet urgjente. Në fakt, ju do të dini të impononi durimin dhe artin e pritjes deri në fundjavë, kur dikush mund të largojë çdo energji negative. Do t’ia hidhni edhe kësaj here.
Akrepi
Herë pas here ia dilni mbanë të përballoni sfida të vështira, të cilat të krijojnë përshtypjen se nuk kapërcehen vërtet. Ja që do të ndodhë kështu! Marsi ndikon që e tashmja e të lindurve në shenjën e Akrepit të jetë e ngjeshur me ngjarje, edhe pse kjo është java kur, më shumë se kurdo, duhet t’i gëzoheni pushimeve dhe argëtimit. Ndonëse shpesh futeni në mendime dhe ndiheni disi të lodhur, gjatë ditëve në vijim do të kujdeseni për ata persona që nuk ia dalin dot mbanë me forcat e veta. Si për çudi, do të hiqni dorë nga dyshimet dhe dilemat dhe do të dini t’i jepni siguri dhe motivim një personi që, për arsye të caktuara, ka humbur besimin. Një përpjekje kjo që do të paraqitet pozitive edhe për ju vetë.
Shigjetar
Ndërkohë që ndodheni vetëm pak ditë larg çlirimit tuaj personal nga rregullat dhe angazhimet e lodhshme dhe të tepruara, si pasojë e Saturnit, sjellja juaj rrezikon të bëhet jo fort sociale, diplomatike apo mirëkuptuese. Kjo mund të ndodhë kryesisht me miqtë tuaj apo me ata që do t’ju qëndrojnë pranë në këtë periudhë kushtuar çlodhjes dhe argëtimit. Bëni kujdes gjatë ditëve të mesjavës, kur dyshimet dhe dilemat, mund ta bëjnë jo fort harmonike bashkëjetesën tuaj me të tjerët. Tabloja do të përmirësohet në fundjavë, sepse pasioni dhe ndjesitë rinore do të kthehen sërish në favorin tuaj. Do të jeni Shigjetarët e zakonshëm.
Bricjapi
A është e mundur që Afërdita të mos ju lejojë ta kaloni në qetësi këtë javë që i kushtohet pushimit dhe çlodhjes? Kjo varet nga ju, ose më saktë, në aftësia dhe vullneti juaj për të mbrojtur hapësirat personale dhe kohën që i takon relaksimit fizik dhe rigjenerimit. Ndaj, është më mirë që të hiqni dorë nga ndjenjat e fajit dhe të jetoni me qetësi çdo çast të vyer të së tashmes. Bëjeni këtë kryesisht kur Jupiteri do t’ju përcjellë një ndjesi të pazakontë sikur po e çoni kohën dëm. Në fundjavë, Marsi do t’ju ndihmojë që të ndiheni përsëri të fortë, të vendosur dhe të gatshëm për të fituar diçka të rëndësishme.
Ujori
Do të jetë një javë që do ta jetoni në mënyrë shumë vetjake, duke i kushtuar rëndësi të madhe gjendjes tuaj shpirtërore, emocioneve dhe gjithçkaje që zgjon ndjesi brenda jush. Do të ndodhë kështu, sepse shpesh përballeni me dyshime, hezitime, me mënyrën tuaj tejet logjike të të vepruarit, që gjatë mesjavës mund të përballet ashpër me ndjenjat. Pra, është një javë që do të ndërlikohet vetvetiu, deri në atë pikë sa vetëm në fundjavë do të ndiheni përsëri të fortë, të qetë dhe të vetëdijshëm. Mundohuni të mbroheni nga ky pozicionim yjesh, duke shmangur zërat jo fort dashamirëse që do t’ju nxisin të mos ruani qetësinë.
Peshqit
Është periudhë pushimesh, bukurie dhe relaksimi. Është periudhë në të cilën do të përjetoni një raport thuajse të përsosur me kënaqësinë dhe të bukurën, aq shumë sa, nëse diçka rrezikon ta prishë këtë idil, s’do të reagoni hiç mirë. Plutoni, të martën, do t’ju bëjë hezitues dhe do të sjellë ulje-ngritje humori te ju. Pozicionimi i yjeve ka dëmtuar kthjelltësinë tuaj dhe s’do të jeni fort të lumtur. Situata do të ndreqet nga e premtja e tutje, mbase kur një miku juaj do t’ju ndihmojë të gjeni sërish motivim dhe të merrni hov, duke ju shtyrë të besoni vërtet në atë që bëni dhe të vlerësoni veten. Kështu, do të gjeni buzëqeshjen.