Nazim Hikmet: Shpirti im

Poeti turk Nazim Hikmet lindi në Selanik në 20 nëntor 1902. Babai i tij, Nazim Hikmet Bej ishte një funksionar shtetëror, ndërsa e ëma, Aisha Dshalia piktore. Fillimisht studioi frëngjisht në Stamboll, më pas hyri në Akademinë Ushtarake, por u detyrua ta braktisë prej problemeve shëndetësore. Pasioni për poezinë iu transmetua nga gjyshi, që përveçse kish qenë guvernator në provinca të ndryshme, ishte dhe shkrimtar dhe poet në gjuhën otomane.

Shpirti im

mbylli sytë

avash avash

siç fundosesh në ujë

zhytu në gjumë

lakuriq dhe veshur me të bardha

më e bukura ëndërr

do të të presë

shpirti im

mbylli sytë

avash avash

përhumbu, si në harkun e krahëve të mi

në gjumin tënd mos më harro

mbylli sytë dalëngadalë

sytë e tu të kaftë

ku digjet një flakë e gjelbër

shpirti im.