Aida Hoxholli: Respekt për të moshuarit!

1 Tetor, Dita Ndërkombëtare e të Moshuarve

Përgjegjësitë nuk janë vetëm materiale dhe fizike, ne kemi edhe përgjegjësi morale. Një prej tyre është respekti që duhet të kemi për njerezit dhe në veçanti për të moshuarit. Prej tyre ka buruar jeta jonë dhe e prindërve tanë. Ata janë mësuesit natyrorë me vlerat më të mira të shoqërisë.

Të moshuarit janë prindërit e mamasë dhe të babait tënd, ata që ti i quan gjyshër. Ata mund të jetojnë në një familje me ju, pranë jush, në një institucion të veçantë për të moshuarit dhe kudo tjetër. Ata janë njerëzit të cilët ne i respektojmë për përvojën që kanë, për mësimet që na japin, për traditat që na trashëgojnë. Ata kanë jetuar shumë para nesh. Ata kanë parë dhe kanë jetuar ngjarje të një kohe kur ne nuk kishim ardhur ende në këtë botë. Ata kanë vuajtur dhe janë gëzuar në vendin të cilit i përkasim. Ata janë rrënjët tona, sepse na përcjellin traditat e familjes ku lindim.

Të moshuarit janë si një libër historie i hapur. Ata tregojnë kohën që kaloi, vlerat e kombit, ngjarje të rëndësishme, jetën e vendit në 100 vjet.

Teksa shihni prindërit tuaj që plaken, me shumë mundësi që brenda jush ndjeni përgjegjësinë për t’u kujdesur për ta. Babai dhe nëna juaj kanë punuar pafundësisht për t’u dhënë jetën që keni sot, një jetë plot mundësi, rehati dhe privilegje. Ndërkohë që ata plaken, është më se e nevojshme që fëmijët e tyre ta kthejnë pas këtë favor dhe të kujdesen e t’i duan ata.

Disa arsye se përse është e rëndësishme që të kujdesemi për më të moshuarit:

1.Sepse bëhet fjalë për nënën dhe për babanë tonë.

Ata janë mësuesit tanë të parë. Ata na mësuan si të duam, si të kujdesemi, si të japim, si të falim, si të pranojmë të tjerët, e mbi të gjitha kanë qenë mbështetja jonë më e fortë. Pa sakrificën e tyre që ka zgjatur me vite, ne nuk do të ishim të aftë të ishim këta që jemi. Respekti dhe kujdesi për të moshuarit fillon me prindërit tanë.

2.Urtësia

Të moshuarit kanë më shumë dije dhe më shumë urtësi se çdonjëri nga ne. Eksperienca që ata kanë e stuhitë që kanë kaluar gjatë jetës së tyre, bën që të kenë një urtësi të çmueshme. Ata kanë ardhur deri këtu dhe kanë mësuar kaq shumë, ne kemi përgjegjësinë që të mësojmë nga kjo urtësi.

3.Ata na duan në mënyrë të pakushtëzuar

Pavarësisht se çfarë ke bërë në jetë, se cili je bërë dhe se ku jeton, prindërit e tu të duan në mënyrë të pakushtëzuar. Patjetër që ndonjëherë ata mund të jenë mërzitur me ty, por ti do të mbetesh fëmija i tyre. Kjo lloj dashurie e pakushtëzuar, është e vështirë të gjendet gjithandej. Prezenca e prindërve të tu të jep shpresën dhe fuqinë për t’u qetësuar e për të vazhduar.

4.Sakrifica

Nëse do të arrijmë të shohim pas, prindërit tanë kanë sakrifikuar vazhdimisht që të na shohin mirë dhe të lumtur. Ata janë siguruar që ne të kemi të gjithë rehatinë e kushtet e nevojshme. Kanë bërë gjithçka që të shohin buzëqeshjen në fytyrat tona. Ata na kanë parë në momentet kur kemi dështuar e kur kemi arritur suksese, e i kanë kujtuar vetes së tyre se për çfarë po luftojnë.
5.Duhet të kujdesemi për ta sepse e ardhmja e tyre është e pasigurt

Vendose veten në vendin e një personi të moshuar. Kur e kupton se trupi yt po dobësohet e se fuqitë po të lenë, është e vështirë që të përballesh me pasigurinë që mund të ndjesh për të ardhmen, qoftë mendërisht ashtu edhe fizikisht. Të moshuarit mund të kenë shumë gjëra në mendjen e tyre, që nuk janë të aftë t’i shprehin. Ne kemi përgjegjësinë që t’u japim ndihmën për të cilën kanë nevojë për t’i ndihmuar që të jetojnë në paqe pjesën tjetër të jetës. Ndaj kujdesu që të jesh ajo dritë dhe dashuri, ji me ta çdo ditë të jetës së tyre.

Dhe ne, do jemi pjesë e kësaj gjenerate një ditë.