Jorida Tabaku: Flasin kundër basteve por janë kumarxhinj të politikës

Deputetja e PD-së, Jorida Tabaku është shprehur se ata që sot flasin kundër basteve sportive dhe kazinove, janë kumarxhinjtë e politikës që fatin e tyre e kanë vendosur në rulotën politike. Në një postim të gjatë në facebook, Tabaku tha se mazhoranca solli në vitin 2015 një ligj klientelist që e ndryshuan në seancën parlamentare për të përmbushur qokat e tyre elektorale.

”Janë ata që përmes një aksioni fasadë “Fundi i Marrëzisë” prdhuan marrëzinë e basteve pafund; Janë të njëjtë me mazhorancën që nuk solli asnjë akt nënligjor për ligjin që miratoi; Janë të njëjtë me mazhorancën dhe kryeministrin që votuan shtyrjen e hyrjes në fuqi të Ligjit të Lojërave të Fatit që vetë votuan; Nën këtë kryeministër u dhjetëfishuan pikat e basteve në kundërshtim me çdo normë ligjore; Nën këtë mazhorancë u dha me koncesion tek kompania e lidhur me vëllain e kryeministrit Sistemi i Monitorimit Online të cilin po e shfrytëzon për të vjelur paratë publike; Nën këtë mazhorancë për një muaj rresht shqiptarët u bombarduan me publicitetin edhe promocionin e lojërave të fatit edhe në TVSH që paguhet me taksat e shqiptarëve”.

Më tej, në postimin e Tabakut lexohet: “Kjo mazhorancë është e fundit që i takon të flasë me Bibël dhe Kuran për lojrat e fatit. Nëse sot kryeministri ankohet për mesazhet që i vijnë nga burgjet, atëherë ai dëshmon se është peng jo i vesit të basteve, por i vesit të të qenurit pjesë e të inkriminuarve. Faktet thërrasin fort përfshirjen e mazhorancës në një tjetër grup të inkriminuar që sot për sot kërkon monopolin e kazinove dhe lojërave të fatit. Lejet e ndërtimit, ligji i ri me emrin “Bast Arena” dhe promovimi i kryeministrit janë shenjat e qarta të qelisë prej nga ku mazhoranca porosit ligjet”.