Filip Guraziu: Mirënjohje e thellë për mikun e madh të shqiptarve, kongresmenin Don H. Clausen

Lajmi i humbjes së Kongresmenit Republikan 91 vjeçar Don H. Clausen, u prit me dhimbje dhe emocion nga komuniteti shqiptar e veçanarisht nga ai shkodran. Një fjalë ‘e urtë‘ shqiptare shprehet: “Miku i mirë në kohë të vështirë”, domethënia e së cilës na bëri të meditojmë dhe te kujtojmë me nderim dhe mirënjohje, personalitetin e lartë shtetëror të SHBA, Kongresmenin Republikan Don H. Clausen i cili në ditët më të vështira për popullin shqiptar, (kujtoni varfërinë ekstreme të periudhës post komuniste) erdhi privatisht në Shqiperi, në vitet 1991 dhe 1992 së bashku me Arqipeshkvin e San Françiskos, Imzot Mark Hurley dhe humanistin nga Santa Rosa, Dr.Bill Sullivan për t’u njohur me situatën dhe për të ndihmuar, duke iu përgjigjur pozitivisht ftesës së bërë nga patrioti nacionalist, humanisti shqiptar me banim ne Santa Rosa-Kaliforni, Z.Tony Prendushi.

Po kush ishte Kongresmeni Rep. Don H. Clausen?

Lindi në Ferndale me 27 prill 1923. U arsimua në disa kolegje, ndër të cilat ‘St.Mary Colllege’ ku plotësoi programin e ‘V5 Naval Aviation Cadet’. Ishte pjestar aktiv në Luftën e Dytë Botërore duke shërbyer si pilot në qiejt e Paqësorit, më pas ndërmori iniciativën për themelimin e një shkolle fluturimi si dhe të organizimit të shërbimit në aeroportin Del Norte. Ai ishte gjithashtu edhe autori i një programi të aviacionit pranë shkollës së lartë të Del Norte. Don H. Clausen hyri në politikë në 1955, shërbeu në Bordin e Autoritetit të Vigjilencës së Qarkut të Del Norte gjatë periudhes kohore 1955 deri 1962. U zgjodh anëtar i Dhomës së Përfaqësuesve në vitin 1963. Gjatë kohës së shërbimit në Kongres, ndër të tjera, i është dedikuar themelimit te Parkut Kombëtar të Redvood (1968) si dhe zgjërimit të tij (1978). Me emërin e tij lidhen edhe iniciativat e financimeve ndaj sistemimit të lumenjve lokalë, mbrojtjen e biodiversitetit te mjedisit ujor etj. Në vitin 1982 është emëruar nga Presidenti Reagan, Drejtor i Projekteve Speciale të Departamentit Administrativ të Transportit Federal Ajror, detyrë që e ka mbuluar deri ne vitin 1990, më pas është transferuar në Fortuna.

Ja se si shprehet Republikani Jared Huffman në komunikatën e lëshuar pas marrjes së lajmit të humbjes se Rep.Don H.Clausen: “Me trishton fakti qe njëri nga mbështetësit më të mëdhej të North Cost nuk është më… ish anëtari i Kongresit Don H. Clausen ishte një kampion per ndihmen që i dha sektorëve të lumenjëve, të pyjeve, të oqeaneve dhe te infrastrukturës toksore që të zhvillohen dhe të përparojnë. Shërbimi i tij për vendin dhe për North Coast do të ketë ndikim të dukshëm në vitet që do të vijnë”.

Në deklaratën e firmosur nga i ndjeri Don H. Klausen për aktivitetin humanitar të Tony Prendushit- ‘Pro Shqipërisë’, shkruhet: “Kushtet ekonomike dhe shoqërorë të Shqipërisë ishin të mjerueshme – për shkak të ’47 viteve të sundimit të Qeverisë Marksiste-Komuniste’ , megjithatë Tony Prendushi nuk kishte harruar gjëndjen e vështirë të vendit të tij të lindjes, Shqipërisë” . Duke qenë mik personal dhe i ngushtë me Sekretarin Jim Baker, Don H.Clausen kishte qene i mirinformuar dhe njëkohësisht i impresionuar nga suksesi i jashtëzakonshëm i vizitës të Sekretarit të Shtetit në Shqipëri. Dashamirësia për popullin shqiptar dhe autoriteti si burrë shteti amerikan bënë që në shërbim të aksionit ‘Pro – Shqipërisë’ të vihet ne dispozicion edhe USA –Army me mjetet e saj të transportit ajror dhe detar. Në ato vite të vështira, kur rezervat e grurit për popullsinë mjaftonin vetëm për 6 ditë…! Ai dhe shokët e tij sollën ndihma kolosale për popullin shqiptar; ushqime, 10.000 batanije, ilaçe, infrastrukturë spitalore, paisje bashkëkohore mjekësore, farëra për bujqësinë, paisje për konviktet etj., etj.

Shkruesi i këtij shkrimi pati fatin ta njohë personalisht Kongresmenin Don H. Klausen gjatë vizitës që ai bëri në Shkodër në vjeshtën e vitit 1992. Mbetet e paharruar dita e ardhjes, mijra qytetarë sapo kishin marrë lajmin që në orën 13.00 do të vinin për një vizitë private dy personalitete të larta të shtetit amerikan; Ipeshkvi Mark Hurley dhe Kongresmeni Don H.Clausen të shoqëruar nga biri i Shkodrës, Z.Tony Prendushi, nxituan për t’i uruar mirësëardhjen miqve të rrallë, pranë Kishës së Zojës, në Hyrje të Shkodrës. Entuziasmi i qytetarve u bë edhe më emocional, pasi pikërisht në momentin që delegacioni arriti, filloi një rrebesh shiu i paparë, i cili pengoi për një moment daljen e miqve nga vetura, por nuk pengoi aspak që populli të këndojë në kor këngë për nderë të të ardhurve. Kaq përshtypje i kishtë bërë të ndjerit Don H.Clauzen ky moment sa edhe pas disa viteve që e pata takuar në San Françisko, e kujtonte me shumë emocion takimin e tij me shkodranët.

Jo vetëm unë, por të gjithë ato që patën rastin të njihen me Don H. Clausen, burrin trup madh me një zemër edhe më të madhe, kujtojnë me respekt dhe mirënjohje kongresmenin e dashur, kujtojnë me mall buzëqeshjen e tij të sinqertë… Jam i sigurtë që edhe ne këtë moment që po shkruaj këto rreshta ‘in memoriam’ të mikut të madh të shqiptarëve , diku atje në Parajsë, buzëqeshja e Don H.Clausen më shoqëron… Amerika lindë njerëz të mëdhej dhe njerëzit e mëdhej, si Kongresmeni Don H. Clausen bëjnë të shëndetshme dhe fitimtare Amerikën! Ngushëllimet të sinqerta familjes për humbjen e këtij njeriu të madh! Mirënjohje të përjetshme nga miqtë në Shqipëri.