Basha: Sytë e Evropës janë sot tek ky shesh

Kreu i Partisë Demokratike, Luzim Basha pas protestës së sotme, e cila korrespondoi edhe me djegien finale të mandateve, ka reaguar sërish në rrjetet sociale. Ai pohon se Shqipëria do të këtë një të ardhme europiane dhe kjo shtoi ai, do të jetë e fëmijëve të shqiptarëve dhe njerëzve të ndershëm të këtij vendi. Lideri i selisë blu thekson se në vend mungon demokracia dhe Parlamenti është kapur nga krimi dhe nuk iu shërben qytetarëve. “Zemrat tona janë të mbushura me shpresë dhe kurajo që buron nga shpirti e një populli të bashkuar. Shqipëria do të ketë një të ardhme europiane dhe kjo do të jetë e ardhmja juaj, e familjeve tuaja, e fëmijëve tuaj, e njerëzve të ndershëm të këtij vendi që duan t’i japin fund padrejtësisë, që duan t’i japin fund pandëshkueshmërisë. Dua t’u them të gjithë atyre që akoma nuk e dinë se këtu nuk ka demokraci, nuk ka Parlament, nuk ka drejtësi dhe se shteti është kapur nga krimi i organizuar, se njeriu që ju del përpara dhe ju shitet si Kryeministër është Maduro i Ballkanit. Ne nuk do të pranojmë më një kryeministër bandit, të kapur në flagrancë duke vjedhur votat e popullit në bashkëpunim me mafiozët, trafikantët, bandat e krimit të organizuar, duke vjedhur qindra miliona nga xhepat e shqiptarëve që nuk paguajnë dot bukën e gojës për fëmijët e tyre. Sytë e Europës janë sot tek ky shesh: ne kërkojmë për shqiptarët vlerat dhe parimet që ata kanë për popujt e vet, liri, demokraci dhe ligjin e barabartë për të gjithë!”,  shkruan Basha.