Pranvera Skana, një diplomate jo si të tjerat
Pranvera Skana punon si konsulle në Londër dhe këshilltare për median dhe Diasporën. Prej disa kohësh jeta e saj është mes Londrës dhe Tiranës dhe udhëton drejt Shqipërisë sa herë ka mundësi. Ajo ka mbaruar studimet në Londër për Shkenca Komunikimi dhe përveç punës si konsullë në ambasadën shqiptarë në Londër, ajo po merret dhe me kurse e trajnime.
Në një intervistë në emisionin “My living” në Vizion Plus, Pranvera ka treguar për jetën e saj në Londër si dhe për punën që bën.
“Puna si konsull sidomos ajo e fokusuar te çështjet e diasporës është një përgjegjësi shumë e madhe. Shpesh miqtë më pyesin çfarë lidhje ke me diplomacinë. Por në ditët e sotme diplomacia nuk ka asgjë me shumë sesa komunikimin. Një mesazh, një komunikim, një lobim, një ndërmjetësim. Ndërsa pjesa e diasporës është kënaqësi e jashtëzakonshme, sidomos kur i sheh shqiptarët të asimiluar dhe të angazhuar atje në mënyra të jashtëzakonshme. Gjenerata e dytë e shqiptareve është intreguar në mënyrë të jashtëzakonshme. Në City of London punojnë mbi 1500 të rinj shqiptarë në sipërmarrje si JP Morgam apo PËC, nga më të mirat në botë. Të gjithë pra në sipërmarrje shumë të mëdha. Në fund të ditës ata janë ambasadorët e vërtetë të Shqipërisë. Kështu që kjo është puna ime ndërmjet medias dhe diasporës. Një tjetër detaj janë universitet apo numri i shqiptarëve që shkollohen në shkollat më të mira si Oxford, janë 2500 studentë shqiptarë që shkëlqejnë. E njëjta vlen dhe për lektorët shqiptarë që japim mësim, për profesorët si në London School of Economics. Pastaj nuk dua të hyj te pjesa artistike, për të thënë se si shkëlqejnë ata në Britaninë e Madhe”, tregon Skana në fillim të emisionit.
Skana, veçon një moment të rëndësishëm gjatë punës së saj, takimin me mbretëreshën Elisabeta II, ku thekson se ky takim ishte planifikuar prej muajsh dhe kishin mësuar çdo gjë që kërkonte protokolli mbretëror:
“Në nëntor të viti 2016, kur Ambasadori dhe stafi ynë shkuam për të prezantuar kredencialet në oborrin mbretëror dhe kam dëshirë të kujtoj disa detaje që departamenti i protokollit me javë të tëra na ka mësuar se si duhet të takojmë dhe si duhet të sillemi në momentin e vizitës apo çfarë duhet të vishnim. Psh ishte kategorike që duhet të vishnim doreza dhe kapelet, nuk duhet të përdornim ngjyrë blu, të zezë dhe të bardhë, të përmbajtur në ‘make up’ dhe në forma të tjera. Ata erdhën na morën me kuaj dhe në shumë rrugë të Londrës, ishte ndalur trafiku. U ndjemë si Royal Family, ndonëse dhe nuk lejohej që të bënim foto. Mbretëresha u impresionua shumë nga barazia gjinore që Ambasada jonë përfaqësonte”.
Gjatë këtyre 6 viteve në Londër, Skana ka marrë dhe sjellje londineze.
“Londra më ka bërë të ndjejë kënaqësi te gjërat më të vogla, si një ecje e shkujdesur në park”.
Pranvera Skana, një nga folëset e para në Top Albania Radio, ka treguar po ashtu se Londra është vendi i paradokseve dhe që njerëzit me pushtet janë të thjeshtë dhe me këmbë në tokë. Prandaj sjell në vëmendje një moment shumë interesant, me të cilin është njohur shtypi britanik.
“Më ka ndodhur një herë duke ikur në punë, në tram dhe u ballafaqova më një zotë ri që më pyeti nëse do ulesha. Unë nuk do të ulesha sepse do të zbrisja.Zotëria ulet, ishte i veshur shumë mirë , dhe hap çantën e shpinës që mbante me vete dhe merr një sallatë, që e përfundon dhe e vendos përse ri në çantë. Pas kësaj zotëria merr një mollë e fshin te xhaketa i jep një kafshatë e mbështjell dhe e vendos përsëri në çantë . Unë po shihja personazhin dhe po mundoja të kuptoja veprimet e tij, sepse dukej një person shumë fisnik. Të nesërmen i gjithë shtypi britanik fliste për këtë personazh i cili ishte gurvernatori i Bankës së Anglisë. Pra Londra është vendi i paradokseve, që të ballafaqon më këtë lloj prakticiteti dhe komoditeti”, rrëfehet ajo./living.al/
