Gerarta, zëri i Arbëreshëve dhe italo-shqiptarëve

Ende nuk është shuar në BE jehona publike e zgjedhjeve europiane. Sovranistët nuk siguruan dot shumicën në PE, por fituan gjithsesi në shtete me rëndësi për ne, si Italia. Aty Lega e Matteo Salvinit siguroi 34% të votave. Po aty konkuronte në zgjedhje shqiptarja e parë kandidate në Parlamentin Europian në Itali, me qendrën e majtë Partito Democratico, që doli forcë e dytë me 23% të votave.

Emri i kandidates shqiptare është Gerarta (Geri për miqtë) Ballo dhe ka punuar përgjatë shumë viteve me Diasporën tonë të hershme (Arbëreshët) dhe të re në Itali. Rezultatet e këtij angazhimi u panë qartësisht: ajo doli e para në listën PD në shumë bashki arbëreshe. Nga Çifti (Civita) në Frasnitë (Frascineto), nga Spixana (Spezzano Albanese) në Shën Mitër, Shën Vasil (San Basile), Shën Kozmo (San Cosmo), Ungër (Lungro, ku është edhe Qytetare Nderi) e të tjera, Gerarta Ballo u konfirmua si “zëri i Arbëreshëve”.

Ajo u mbështet edhe nga shqiptarët e Jugut të Italisë, ku kandidonte. Ndonëse në këto zona shqiptarët nuk janë të organizuar në shoqata sa në Italinë veriore, mbështetja e atyre që mësuan për kandidaturën e Gerit nuk mungoi. Kështu përshembull në qytezën e Tollos, në Abruzzo, ajo doli më e votuara falë angazhimit të komunitetit tonë aty, që u aktivizua edhe duke i kërkuar miqve italianë votën.

Gerarta Ballo arriti 21 mijë preferenca personale, pra qytetarësh italianë që shkruajtën emrin e saj në fletat e votimit krahas simbolit të Partito Democratico. Rezultati nuk ishte i mjaftueshëm për t’u bërë eurodeputete por është një sinjal i rëndësishëm për mbarë komunitetin tonë në Itali.

Në momentet e para pas zgjedhjeve Gerarta vë theksin te betejat politike që duhen bërë. E drejta për pension e qindra mijëra qytetarëve shqiptarë të Italisë (“mes të cilëve është edhe ime më, ndaj këtë problem e jetoj edhe unë bashkë me gjithë të tjerët”, thotë Gerarta), por edhe tejzgjatja e pritjes për nënshtetësinë italiane (“nga 2 vjet në 4 pas Ligjit për Sigurinë të Ministrit Matteo Salvini, që peshon mbi shpatullat e emigrantëve tanë”, shton Ballo).

Çështjet janë të shumta, për t’u përballur me to “duhet rrjetëzim i shoqatave, profesionistëve, çdo individi që dëshiron të kontribuojë”, nënvizon ajo. “Këto zgjedhje ishin një hap i parë i suksesshëm në këtë drejtim, por mund të arrijmë shumë më tepër bashkë. Jam e bindur se komuniteti ynë është tashmë gati për këte angazhim të përbashkët”.

Gerarta Ballo ka nisur jetën e saj në itali në moshën 11 vjeçe dhe ka qenë gjithmonë aktive ndër vite dhe një zë i rëndësishëm i komunitetit shqiptar të Italisë.Ka kryer studimet në degën e marrëdhënieve ndërkombëtare në Torino dhe ka punuar si gazetare, duke themeluar njëkohësisht disa shoqata të cilat lidhen ngushtë me aktivitetin e saj për të rinjtë, emigrantët dhe gjeneratat e dyta.

Në këtë qytet pothuajse 10 vjet më parë drejtonte emisionin radiofonik ‘Shqip in Torino’.Pikë referimi për diasporën e hershme të arbëreshëve dhe atë të re shqiptaro-italiane, Gerarta nuk u shkëput nga Shqipëria. Përkundrazi, eksperienca e punës më e fundit është në diplomacinë shqiptare, ku punoi për dy mandate në Ambasadën e Shqipërisë në Romë.Gerarta gëzon respektin dhe mbështetjen e arbëreshëve, nga ku ka marrë edhe vlerësime të rëndësishme siç është titulli Qytetare Nderi e Lungro-s, bashki arbëreshe e Kalabrisë ku ndodhet selia e Ipeshkvisë së ritit bizantin.

Mbështje të madhe ka marrë nga miq të shumtë italianë, por edhe nga komuniteti shqiptar në Itali që po vjen duke u shtuar ora orës./perqasje.com/