ARDJANA DRAGOI: M’U BËRE JETË

Më merr për dore e më tregon
Pa vetëdije m’u bëre jetë
Po s’shkruan dora , shpirti rëndon
Mendimi çmëndet e kërkon fletë.

Orë e pa orë , më zgjon nga gjumi
Nuk ta prish dot se të kam jetë
Një Zot e di , ç’erë të pruri
Apo ky shpirt të zgjoi vetë?

Ti muza ime , m’u bëre jetë
E bëre varg , gjithë ndienjën time
Atë që shpirti me zë s’e flet
E thua ti me vargëzime.

Ti depërton në skuta shpirti
E udhëton në rrugë jete
Rrënjosur thellë këtij mendimi
E brenda kësaj zemre mbete.